Xalqni birlashtirgan ezgu harakat...

Har bir inson baxtli yashashga haqli. Taqdir sinovlari tufayli turli xastaliklarga duchor boʻlgan insonlarni, ayniqsa, bolajonlarni qoʻllab –quvvatlash, ularni dardiga shifo baxsh etishga harakat qilish xalqimizning azaliy qadriyati hisoblanadi. Har yili mamlakatimizda “Аdolat” SDP tomonidan oʻtkazib kelinayotgan “Bor mehrimiz senga, bolajon!” shiori ostidagi begʻaraz donorlik xayriya aksiyasi xalqimizni ezgu maqsad yoʻlida yanada jipslashtiradi.

Bu yil ham 1-iyun Xalqaro Bolalarni himoya qilish kuni munosabati bilan “Аdolat” SDP Fargʻona viloyat Kengashi tomonidan anʼanaviy donorlik aktsiyasi tashkil etildi. Fargʻona viloyat qon quyish stansiyasidagi xayrli tadbirda partiyaning viloyat Kengashi mutaxassislari, korxona va tashkilotlar, taʼlim muassasalarida faoliyat koʻrsatayotgan 18 yoshdan 60 yosh doirasidagi 100 lab koʻngilli donorlar ishtirok etdi.

Ezgulik harakatlari Qoʻqon shahridagi qon qoʻyish stansiyasida ham davom etdi. Unda Qoʻqon, Uchkoʻprik, Furqat, Oʻzbekiston, Dangʻara, Buvayda, Rishton, Furqat tuman kengashlari raislari va deputatlar va faollar ishtirok etdilar.

Аksiya davomida topshirilgan qon viloyatimizdagi oq qon, saraton kasalliklaridan aziyat chekayotgan hamda baxtsiz hodisalar tufayli koʻp qon yoʻqotgan bolajonlarimizning hayotlarini saqlashga, mehr oqibat, odamiylik tuygʻularini yanada oshirishga xizmat qiladi.

“Аdolat“ SDP yoshlar taqdirida muhim ahamiyatga ega boʻlgan bu kabi savobli aksiyalarni tashkil etib, elektoratining asosiy qatlamini tashkil etuvchi shifokorlar mushkulini oson qilmoqda. Qolaversa, tadbir bahona aholi oʻrtasida donorlikning organizm uchun foydali jihatlari, afzalliklari xususida kengroq tushuntirish ishlari olib borildi.

“Adolat”SDP

Farg’ona viloyat kengashi matbuot xizmati.