Xasta bolajonlarga gʻamxoʻr boʻlaylik!

Mana bir necha   yillardan buyon “Adolat” SDP Markaziy apparati tashabbusi bilan anʼanaviy tarzda Respublikamiz hududlari boʻylab “Bor mehrimiz senga, bolajon” shiori ostida begʻaraz donorlik aksiyasi oʻtkazib kelinmoqda.

Mazkur donorlik aksiyasidan koʻzlangan asosiy maqsad partiyaning aholi salomatligini saqlash, fuqarolarni koʻngilli ravishda qon topshirishga chaqirish va shu orqali tibbiy-ijtimoiy koʻmakka muhtoj bolalarni qoʻllab-quvvatlash, bemor bolalarning hayotini saqlab qolish, shuningdek, jamiyatda insonparvarlik va mehr-oqibat gʻoyalarini targʻib qilishdan iborat.

Bundan tashqari, aksiya bemor insonlarga qon quyish uchun xavfsiz qonning muhimligi, donorlarining jamiyat uchun zarurligi, qolaversa, koʻngilli donorlarning insoniyat oldidagi xizmatlarini ragʻbatlantirib borishni oʻz ichiga qamrab oladi.

Azal-azaldan xalqimizning qon-qoniga singib ketgan xislatlaridan biri ogʻir ahvolda qolgan insonlarga koʻmak berishi bugungi avlod tomonidan ham davom etib, chorasiz insonlarni qoʻllab-quvvatlash borasidagi ezgu va xayrli ishlaridan sanaladi.      

Oʻzbekiston “Adolat” SDP Qashqadaryo viloyat Kengashi aʼzolari partiyaning “Bor mehrimiz senga bolajon” aksiyasi doirasida uyushtirilayotgan barcha xayrli va savobli ishlarda hamisha faol qatnashib kelishyapti. Xasta bolajonlar holidan muntazam xabar olinib, ularga sovgʻa salomlar ulashib, shodliklariga shodlik qoʻshishga muvaffaq boʻlyaptilar.

Bugun ham erta tongdanoq oʻnlab partiyamiz fidoiylari oʻz qonlarini topshirish uchun viloyat qon quyish markaziga tashrif buyurdilar. Navbat bilan qon topshirib, xasta dillarning duosini oldilar. Viloyat ichki ishlar boshqarmasi, Adliya boshqarmasi, Milliy gvardiya, Viloyat turizmni rivojlantirish boshqarmasi, Yoʻl harakati xavfsizligini taʼminlash viloyat boshqarmasi, ommaviy axborot vositalari vakillari va boshqa hamkor tashkilotlar xodimlari oʻz insoniylik burchlarini ado etish uchun toʻplandilar.

 -Bunday oliyhimmat partiyadoshlarimiz sarasiga viloyat deputati Ruiddin Raupov, Oliy Majlis Qonunchilik palatasi deputati yordamchisi Nodir Isomov, Humoyun Roʻziyev, Doston Nusurov, Akmal Xaitov va boshqalarni kiritish mumkin,-dedi partiya viloyat Kengashi raisi oʻrinbosari Gulnoza Radjabova.-Chunki ular cheksiz mehri, saxiy qalbi bilan saxovatning eshigini ochganlardan. Bundan tashqari, ular har doim oʻz yordamlari bilan xasta bolajonlar huzurida boʻlishni kanda qilishmaydi.

Yoshlarda vatanparvarlik, ezgulik va mehr-oqibatni shakllantirishga xizmat qiluvchi bu tadbirda potensial donorlar qatori Qashqadaryo viloyati ichki ishlar organlari xodimlari koʻngillilar safida aksiyada qatnashib, qon topshirishdi.

Aksiyada 18 yoshdan 60 yoshgacha boʻlgan sogʻlom insonlar koʻngilli donor sifatida ishtirok etdi. Ular dastlab tibbiy tekshiruvdan oʻtkazilib, shifokor tavsiyasiga binoan donor boʻlishdek savobli ishda qatnashdi.

Viloyat qon quyish markazida bugun tumonat adolatchilar, xayrixohlar toʻplangan. Ular navbatma-navbat xasta bolajonlarga insoniylik yordamini koʻrsatishga oshiqishyapti. Oʻz navbatida biz ham ularning bu savobli ishlarida omad, oʻzlariga sihat-salomatlik tilaymiz.

Sogʻlom kishi uchun qon topshirish, albatta, xavfsiz shu bilan birga, foydalidir. Begʻaraz donorlik esa kimningdir salomatligi, uning hayoti uchun hadya etiladigan bebaho neʼmatdir.

Dilrabo Choriyeva,

 “Adolat” SDP Qashqadaryo viloyat  Kengashi bosh mutaxassisi.