Xonqalik saylovchilarning konstitutsion faolligi oshirilmoqda

Ayni kunlarda Oliy Majlis Qonunchilik palatasi deputati Maqsud Qurbonboyev xonqalik saylovchilari huzurida boʻlib, ularning yashash sharoiti bilan yaqindan tanishish bilan bir qatorda mamlakatimizda qizgʻin pallaga kirib borayotgan siyosiy jarayon- “Oʻzbekiston Respublikasi Konstitutsiyasiga oʻzgartirish va qoʻshimchalar kiritish munosabati bilan targʻibot tadbirlari samarali tashkil etilmoqda.

Tadbirlar davomida deputat M.Qurbonboyev yetakchiligida tuman hokimi M.Davletov hamda mutasaddilar saylovchilar bilan ochiq muloqotlarda konstitutsion islohotlar va ularning inson hayoti, mamlakatimiz taraqqiyotidagi beqiyos oʻrni xususida bir qator hayotiy misollar bilan atroflicha tushunchalar berilmoqda.

Tuman “Madaniyat” markazida tashkil etilgan tadbir ham ana shu maqsadlarni oʻz ichiga oldi. Tadbirga korxona-tashkilotlar mutasaddilari, mahalla raislari, xotin- qizlar va yoshlar yetakchilari, maktab direktorlari, maktabgacha taʼlim muassasa rahbarlari ishtirok etishdi.

Taʼkidlanishicha, Yangilanayotgan Konstitutsiya Oʻzbekiston jamiyatining evolyutsion rivojlanishidan kelib chiqayotgan hayotiy zarurat boʻlib, oʻz navbatida mamlakat, millat va xalq sifatida keyingi qadamlarimizni aniqlab olishimiz uchun gʻoyat ahamiyatli masala, adolatli jamiyat qurish yoʻlidagi ulkan qadamdir.

Soʻnggi olti yilda erishgan yutuqlarimizni, xususan, iqtisodiyot, inson huquqlari, odil sudlov, soʻz va eʼtiqod erkinligi, ijtimoiy himoya sohalaridagi yuzlab cheklovlarning olib tashlangani, naqd pul, valyuta, kredit masalalaridagi muammolar hal qilingani, qoʻshnilarimiz bilan oramizdagi 25 yillik “muzlar erigani” va boshqa ijobiy harakatlar ortga qaytmasligining konstitutsiyaviy himoyasini taʼminlash zarur. Bu yutuqlar, huquq va erkinliklardan nafaqat hozirgi, balki kelajak avlodlarimiz ham emin-erkin foydalanishi uchun, ularni, albatta, Konstitutsiyada muhrlab qoʻyish talab etilmoqda.

Shuningdek, uchrashuvlar davomida Oʻzbekiston Respublikasi Konstitutsiyasiga oʻzgartirish va qoʻshimchalar kiritish umumxalq muhokamasiga qoʻyilgani, yangi tahrirdagi Konstitutsiya 65 foizga yangilanib, 128 moddadan 155 moddaga koʻpaygani, har bir kiritilgan oʻzgartirish va qoʻshimchalar fuqarolarning yashash sharoitini yanada yaxshilash va ularning turmushidan rozi boʻlib yashashlari uchun xizmat qilishi hamda boshqa oʻzgartish va qoʻshimchalar yuzasidan atroflicha maʼlumotlar berildi.

Konstitutsion fikr va mulohazalar, taklif va tavsiyalar qizgʻin tus olgan uchrashuv soʻngida ishtirokchilar oʻzlari qiziqqan savollarga mutasaddilardan atroflicha javoblar olishdi.

Bir soʻz bilan aytganda faollarning bu kabi saʼy harakatlari fuqarolarning konstitutsion bilimlarini mustahkamlash orqali joriy yilning 30-aprel kunida boʻlib oʻtadigan referendumda faol ishtirok etib, mamlakatimiz taqdiri uchun munosib ovoz berishida muhim ahamiyatga egadir.

Tumanda bu kabi tadbirlar davom etmoqda.

Zamira Abdullaeva,

“Adolat” SDP  Xorazm viloyat Kengashi matbuot kotibi.