Xorazm viloyatida Robaxon Maxmudovaning saylovchilar bilan uchrashuvi boʻlib oʻtdi

Bugun Toshkent axborot texnologiyalar universiteti Urganch filialida Oʻzbekiston Respublikasi Prezidentligiga “Adolat” sotsial-demokratik partiyasidan koʻrsatilgan nomzod Robaxon Maxmudovaning xorazmlik saylovchilar bilan uchrashuvi boʻlib oʻtdi.

Uchrashuvda Oliy Majlis Qonunchilik palatasi va mahalliy Kengash deputatlari, partiya Markaziy apparati va Xorazm viloyat Kengashi xodimlari, faollar, mehnat faxriylari, talaba-yoshlar va xotin-qizlar hamda ommaviy axborot vositalari vakillari, jurnalist va blogerlar ishtirok etishdi.

Dastlab, “Adolat” sotsial-demokratik partiyasidan Oʻzbekiston Respublikasi Prezidentligiga nomzod Robaxon Maxmudovaning bosh ishonchli vakili Inomjon Qudratov Prezidentlikka nomzod haqida yigʻilganlarga batafsil maʼlumot berdi.

Shundan soʻng Robaxon Maxmudova Saylovoldi dasturida ilgari surilayotgan ustuvor yoʻnalishlar, jumladan, huquq­qiy davlat qurish, davlat va jamiyat hayotida ijtimoiy adolatni qaror toptirish, milliy iqtisodiyotimizning barqaror oʻsishini taʼminlash, ilm-fan, innovatsiya­lar va taʼlim sohasini barqaror rivojlantirish, aholi salomatligini muhofaza qilishga doir maqsad va vazifalari xususida soʻz yuritdi.

Taʼkidlanganidek, xalqimiz maʼqullab bergan Konstitutsiyada ilk bor Oʻzbekiston Respublikasi huquqiy davlatdir, degan yuksak qoida oʻz ifodasini topdi. Bosh Qomusimizda inson huquqlari kafolatlariga oid normalar ham 3,5 barobar koʻpaytirildi. Bu esa barcha sohalarda qonun ustuvorligini taʼminlash eng ustuvor vazifamiz boʻlishi lozimligini anglatadi. Negaki, qonun ustuvor boʻlgan jamiyatda tinchlik va osoyishtalik hukm suradi, taraqqiyotning barqaror va bardavomligi taʼminlanadi, xalqning davlat siyosatiga va kelajakka boʻlgan ishonchi ortadi, fuqarolarning Vatan taqdiriga daxldorlik tuygʻusi yuksaladi.

Maʼruzasi davomida Prezidentlikka nomzod Dasturidan oʻrin olgan ijtimoiy sohani rivojlantirishga oid maqsadlariga alohida toʻxtaldi:

“Fuqarolarni ijtimoiy himoya qilish va bu yoʻnalishda tadbirkorlik subyektlari faoliyatini qoʻllab-quvvatlash boʻyicha “Ijtimoiy davlat – 2030” dasturini ishlab chiqish lozim, deb hisoblaymiz.

Davlatning iqtisodiy faoliyati natijasida yuzaga kelgan daromadni adolatli taqsimlashni taʼminlaydigan huquqiy mexanizmlarni ishlab chiqish birlamchi vazifamizdir.

Biz hududlar oʻrtasidagi iqtisodiy bir xil oʻsishni taʼminlash, tuman va shaharlarni bir maromda rivojlantirish tarafdorimiz”, — deb taʼkidladi Robaxon Maxmudova.

Qolaversa, jarayonda “Qonun ustuvorligi — adolatli jamiyat qurishning muhim sharti!” degan tamoyilni jamiyatning har bir aʼzosi, ayniqsa, mansabdor shaxslar faoliyatining muhim qoidasiga aylantirish, inson huquq va erkinliklarini taʼminlash, har bir shaxsning qadr-qimmatini eʼzozlash erkin va adolatli jamiyatning ajralmas xususiyati ekani aytib oʻtildi.

Shu bilan birga, Dasturda oʻrta va uzoq muddatli istiqbolga moʻljallangan ijtimoiy yoʻnaltirilgan iqtisodiy dasturlarni ishlab chiqish va hayotga tatbiq etish, ushbu dasturlarni nazorat qilish tizimiga yangicha yondashish, innovatsion rivojlanish va innovatsion iqtisodiyot, samarali iqtisodiy siyosat vositalaridan oqilona foydalanish kabi dolzarb masalalar belgilanganligi xorazmlik saylovchilarning eʼtiborini tortdi.

Fikr va mulohazalarga, taklif va tavsiyalarga boy boʻlgan uchrashuv soʻngida Prezidentlikka nomzod Robaxon Maxmudova saylovchilarning qiziqtirgan savollariga atroflicha, hayotiy misollar bilan asosli javoblar berdi.

Tadbirda soʻz olgan maʼruzachilar nomzodning dasturi, unda ilgari surilayotgan gʻoya va maqsadlarni qoʻllab-quvvatlash barobarida, yigʻilganlarni kutilayotgan muhim siyosiy tadbir — Oʻzbekiston Respublikasi Prezident saylovida Robaxon Maxmudovaga ovoz berishga chaqirishdi.

“Adolat” SDP

Xorazm viloyat kengashi Matbuot xizmati.