Xorazmda imzo toʻplash jarayonlari uyushqoqlik bilan olib borilmoqda

Saylovchilarning imzolarini toʻplash Oʻzbekiston Respublikasi Prezidenti saylovining eng muhim va dastlabki bosqichi hisoblanadi. Ayni paytda “Adolat” sotsial-demokratik partiyasining viloyatdagi barcha hududiy boʻlimlari, vakillari, deputatlari, boshlangʻich partiya tashkilotlari faollari ishtirokida Oʻzbekiston Respublikasi Prezidentligiga partiyadan koʻrsatilayotgan nomzodni qoʻllab-quvvatlovchi imzolar toʻplash jarayoni uyushqoqlik bilan tashkil qilinmoqda.

Xususan,   Xorazm “Maʼmun” akademiyasida tashkil etilgan nomzodni qoʻllab-quvvatlovchi imzolar toʻplashga qaratilgan targʻibot tadbirda partiya faollari, akademiyaning olimlari, xodimlari, BPT aʼzolari, taʼlim va tibbiyot sohasi vakillari, yoshlar hamda ommaviy axborot vositalari   ishtirok etishdi. imzo yigʻish jarayonida 100dan ortiq fuqarolar partiyadan koʻrsatilgan nomzodni yoqlab oʻz imzosi bilan fuqarolik pozitsiyasini imzo varaqalari orqali namoyon etishdi.  

Shukuroy Madaminova, partiyaning Xiva tuman Kengashi raisi:

–Ayni damda, Oʻzbekiston Respublikasi Prezidentligiga koʻrsatilgan Robaxon Mahmudovaning nomzodini qoʻllab-quvvatlovchi imzolarni toʻplash qizgʻin pallaga kirgan. Tadbir avvalida, siyosiy jarayonlarda partiya tomonidan olib borilayotgan ishlar, Saylov kodeksining mazmun va mohiyati, saylovda faol ishtirok etish hamda nomzodni qoʻllab-quvvatlashga doir imzo varaqasini toʻldirish talablari va maqsadi toʻgʻrisida partiya faollari tomonidan atroflicha maʼlumotlar berib oʻtildi.   Imzo qoʻyish jarayonida xalqimizning huquqiy, siyosiy va ijtimoiy bilimlari oshgani kuzatildi.

Bir soʻz bilan aytganda, viloyatdagi taʼlim va tibbiyot muassasalari, mahalla fuqarolar yigʻinlari, aholi gavjum joylar va boshqa manzillarda tashkil etilgan imzo varaqalarini toʻplash jarayonida yuzlab yurtdoshlarimiz “Adolat” SDPdan koʻrsatilgan nomzodni qoʻllab-quvvatlab, Vatan taqdiriga befarq boʻlmagan xolda imzo varaqalariga imzo qoʻydilar.

Zamira Abdullayeva,

  Oʻzbekiston “Adolat” SDP

    Xorazm viloyat Kengashi matbuot kotibi.