Xorazmda “Yoshlar parlamenti” aʼzoligiga saylov jarayonlarining birinchi bosqichi qizgʻin pallada

Maʼlumki, joriy yilning 23-yanvar kunidan Oʻzbekiston Respublikasi Oliy Majlis Qonunchilik palatasi huzuridagi “Yoshlar parlamenti” aʼzoligiga saylov jarayonlariga start berildi.

Saylovni oʻtkazishdan maqsad, yoshlarni Oliy Majlis Qonunchilik palatasiga jamoatchilik asosida koʻngilli ravishda jalb qilish, qonun ijodkorligi va deputatlar bilan yaqindan tanishish barobarida ularni huquqiy va siyosiy madaniyatini yuksaltirish, Vatanga muhabbat va boshqa daxldorlik tuygʻularini oshirishdan iboratdir.

Saylovni munosib oʻtkazish hamda munosib nomzodlarni saralash maqsadida tuzilgan partiyaning Xorazm viloyat Kengashi hamda Xonqa tuman Kengashi faollaridan tarkib topgan ishchi guruh oʻz faoliyatini faollik bilan boshlab yubordi.

Partiya faollari yoshlar orasida boʻlib, saylovda oʻz nomzodini koʻrsatishga qaror qilgan xonqalik va yangiariqlik yoshlar bilan dildan suhbatlashib, ularga saylov Nizomi toʻla tanishtirilmoqda.

Xususan, partiyaning viloyat, Xonqa tuman Kengashlariga tashrif buyurayotgan yoshlarga “Yoshlar parlamenti” aʼzoligiga saylov Xonqa tuman 121-saylov okrugida oʻtkazilishi, 23-yanvardan 15-fevralgacha hujjatlar qabul qilinishi, saylov Nizomining talablari tushuntirilmoqda. Yoshlarni qiziqtirgan savollariga batafsil javoblar berilmoqda.

Toʻxtajon Quryazova, yosh adolatchi:

- “Adolat” SDPning saylovoldi dasturida ilgari surilgan ilgʻor gʻoyalar va partiya tomonidan amalga oshirilayotgan turli loyihalar doirasidagi ishlar eʼtiborimni tortib kelgan. Partiyaning yosh adolatchisi sifatida partiyaning koʻplab tadbirlarida ishtirok qilib kelmoqdaman. Partiya tashabbusi bilan 2021-yilning dekabr oyida boʻlib oʻtgan “Konstitutsiya bilimdoni” koʻrik-tanlovining Respublika bosqichida faol ishtirok etganim, partiyaning “Adolat doʻppisi”ga loyiq deb topilganim partiyaga boʻlgan mehrimni yanada oshirdi. Ayni damda orzularimdan biri boʻlgan “Yoshlar parlamenti” aʼzoligiga hujjatlarimni topshirdim. Saylovda gʻolib boʻlishga hamda partiyamning rivoji uchun bor kuchimni safarbar etib, Yangi Oʻzbekistonimizni barpo etishda munosib hissamni qoʻshishga bel bogʻladim.

Bir soʻz bilan aytganda, mazkur saylov, yoshlarni siyosiy va huquqiy bilimlarini mustahkamlashga, siyosiy partiyalar toʻgʻrisidagi tushunchalarini mustahkamlashga, vatanparvarlik tuygʻularini hamda kelajakka boʻlgan ishonchini oshirishga xizmat qilishi bilan ahamiyatlidir.

Zamira ABDULLAYEVA,
“Adolat” SDP Xorazm viloyat Kengashi matbuot kotibi