Xorazmlik tadbirkorlar faoliyati o‘rganildi

Xalq bilan ochiq muloqot qilish, chekka-chekka hududlarda bo‘lib, odamlarning dardu tashvishlari, muammolarining yechimlariga doimiy e’tibor qaratish Oliy Majlis Qonunchilik palatasi deputatlari faoliyatining muhim yo‘nalishlaridan biri hisoblanadi.

Spiker o‘rinbosari Z.Ibragimova boshchiligidagi bir guruh deputatlar Xorazm viloyatida bo‘lib, yangi ish o‘rinlarini yaratish, aholi bandligini ta’minlash bo‘yicha amalga oshirilayotgan ishlar holatini o‘rgandi.

Ishchi guruh a’zolarining dastlabki manzili Xonqa tumani bo‘ldi. Deputatlar hududda aholi, ayniqsa, yoshlar va xotin-qizlar bandligini ta’minlash, ularni kasb-hunarga o‘rgatish va tadbirkorlik faoliyatini yo‘lga qo‘shishlariga ko‘maklashish borasida olib borilayotgan ishlar holati bilan tanishdi.

Xususan, tumandagi Paxtagul, Istiqlol va Barkamolik mahallalarida yashovchi yosh tadbirkorlar bilan uchrashib, ularning faoliyatini o‘rgandi. Keyingi yillarda yurtimizda tadbirkorlikni rivojlantirish, ishbilarmonlarni har tomonlama qo‘llab-quvvatlash borasida amalga oshirilayotgan islohotlar haqida tushuntirishlar berdi.

Shundan so‘ng deputatlar Xonka tumani "Ehtirom" mahallasida Baxtiyer Maxmudov tomonidan tashkil kilingan "Shoira Avazbek" oilaviy korxonasida bo‘lishdi. Bu yerda 10 dan ortiq fuqaroning bandligi ta’minlangan. Suhbat jarayonida xalq vakillari Prezidentimizning tadbirkorlar bilan ochiq muloqoti chog‘ida ilgari surilgan tashabbuslar haqida batafsil ma’lumotlar berdilar.

Parlament quyi palatasi deputatlari shuningdek, "Ehtirom" mahallasida faoliyat yuritayotgan tadbirkor B.Botirovning korxonasida bo‘lib, bu yerda ixchi-xodimlar uchun yaratilgan sharoitlarni ko‘zdan kechirdi.

O‘rganish jarayonida tadbirkor o‘z faoliyatini kengaytirish rejasi borligi, ishlab chiqarishga mo‘ljallangan yer maydoni kerakligini bildirdi. Muammoni joyida hal qilish maqsadida tuman arxitektura va qurilish bo‘limi xodimlari bilan bog‘lanib, masalaga ijobiy yechim izlandi.

Deputatlar mazkur uchrashuvlar chog‘ida Gulguncha mahallasida fuqaro M.Muxtorjonov tomonidan tashkil kilingan "Ideal Mebel" oilaviy korxonasi faoliyati bilan ham tanishdi.