Xotin-qizlar huquqlarining kafolatlari: mening imkoniyatim – o‘z kelajagim poydevori

Ayol millatning ko‘rki hisoblanadi. Agar ayoldagi tabiiy go‘zallik yoniga nafosat, nazokat, ijtimoiy faollik, atrofdagi qaynoq hayotdan boxabarlik, orasta va oqilalik, bilim hamda kamolot qo‘shilsa, shubhasiz, u butun jamiyatning boyligiga aylanadi. Ming shukurki, Mustaqillik yillarida xotin-qizlarning huquq va manfaatlarini ta’minlash, fuqarolik jamiyatini barpo etishda ularning rolini oshirishga jiddiy e’tibor qaratildi. Oilada, davlat va jamiyat qurilishida, tadbirkorlik sohasida ayollarning faolligini yanada kuchaytirish muhim hayotiy zaruratga aylandi.

Bu borada O‘zbekiston “Adolat” SDP ham o‘zining saylovoldi dasturida jamiyatning ijtimoiy-siyosiy hayotida xotin-qizlar faolligi va rolini oshirish, ularni ijtimoiy himoyasini mustahkamlash, ayollarni passiv kuzatuvchi emas, balki mamlakatda ro‘y berayotgan demokratik o‘zgarishlarning faol va tashabbuskor ishtirokchisiga aylantirish, jamiyat va davlat hayotining barcha jabhalarida gender teng huquqligiga erishish, xotin-qizlarning qonuniy huquq va manfaatlarini ta’minlash, iqtidorli hamda yuqori malakali xotin-qizlarni davlat boshqaruvi va siyosatga faol jalb etish, ayol-qizlarga nisbatan zo‘ravonlikning oldini olish, muhojirlarning mehnat huquqlarini himoya qilish partiyaning ustuvor vazifalaridan biri sifatida belgilab olingan.

Aynan shu maqsadda “Adolat” SDP Siyosiy Kengashi Markaziy apparati tashabbusi bilan O‘zbekiston Respublikasi Oliy Majlis Qonunchilik palatasi hamkorligida mamlakatimizdagi siyosiy islohotlarda ayollarning faolligini oshirish, ularni ilmli va ma’rifatli qilish borasidagi islohotlarni yanada kengaytirish, jamiyat rivojiga daxldorlik hissini oshirish hamda ularning farovon turmush kechirishi uchun zarur shart-sharoitlarni yaratish va eng asosiysi barcha davlat islohotlarida ularning ishtirokini ta’minlashga erishish maqsadida “O‘zbekiston mustaqilligining 32 yilligi: xotin-qizlar huquqlarining kafolatlari: mening imkoniyatim – o‘z kelajagim poydevori” mavzusida davra suhbati tashkil etildi.

Oliy Majlis Qonunchilik palatasi deputatlari, partiyaning Siyosiy Kengashi a’zolari, partiya Markaziy apparati hamda hududiy, mahalliy Kengashlar xodimlari, “Ayollar qanoti” Kengashi raislari, partiyaning faol xotin-qizlari, davlat mukofotiga sazovor bo‘lgan xotin-qizlar hamda OAVlar vakillari ishtirok etgan tadbirda mustaqillik yillarida mamlakatimizda olib borilayotgan keng ko‘lamli islohotlar zamirida ayollar masalasining alohida ahamiyat kasb etayotganligi xususida so‘z yuritildi.

Dastlab, tadbir moderatori partiya Siyosiy Kengashi Markaziy apparati boshqarma boshlig‘i Gulniso Saidova  tomonidan bugungi kunda ayollarning huquq va erkinliklarini ta’minlash, ijtimoiy faolligini yuksaltirish, tadbirkorlik qobiliyatini ro‘yobga chiqarish va shu bilan ularning jamiyatdagi mavqeyini mustahkamlashga qaratilgan qator chora-tadbirlar tizimining yaratilganligini ta’kidlab o‘tildi.

Shuningdek, tadbir davomida Oliy Majlis Qonunchilik palatasi deputati Muzaffara Abdievaning  “Yangi O‘zbekistonning siyosiy maydonida xotin-qizlarga yaratilayotgan imkoniyatlar va ularning jamiyat rivojidagi roli” borasida qilgan ma’ruzasi hayotiy asoslar va izchil tahlillarga boy ekanligi bilan yig‘ilganlarda katta taassurot uyg‘otdi.

O‘zbekiston “Adolat” SDPning Oliy Majlis Qonunchilik palatasi huzuridagi “Yoshlar parlamenti”dagi siyosiy guruhi rahbari Akbarshoh Teshaboevning “O‘zbekistonda xotin-qizlarning ijtimoiy-siyosiy huquqlarining ta’minlanishi” borasida qilgan ma’ruzasi orqali tadbir ishtirokchilari ayni sohaga oid qonunchilikdagi so‘ngi yangiliklardan boxabar bo‘lishdi.

Partiya faollari va “Ayollar qanoti” Kengashi raislarining ma’ruzalariga, o‘zaro muhokamalar hamda munozaralarga boy tarzda o‘tgan tadbir jarayonida ishtirokchilar o‘zlarini qiziqtirgan savollarga javob olish barobarida, fikr va tajriba almashish imkoniyatiga ega bo‘lishdi. Muxtasar aytganda mustaqilligimizning 32 yillik shodiyonalari arafasida tashkil etilgan mazkur tadbir chin ma’noda ayol-qizlarimiz uchun manfaatli va bayram shukuhiga boy bo‘ldi.

“Adolat” SDP Matbuot xizmati.