Xotin-qizlar va bolalar huquq va erkinliklari – qonun himoyasida

Mamlakatimizda xotin-qizlarning huquq va manfaatlarini taʼminlash, iqtisodiy, ijtimoiy va siyosiy faolligini oshirish davlat siyosatining muhim yoʻnalishi sifatida belgilangan. Joylarda xotin-qizlarning huquq va manfaatlarini taʼminlash borasida turli tadbirlar oʻtkazilib kelinmoqda. Jumladan, joriy yilning 22 avgust kuni akademik Toʻra Mirzayev nomidagi Shofirkon tuman axborot-kutubxona markazida Oʻzbekiston Respublikasi Davlat Mustaqilligining 32 yilligi munosabati bilan “Yangi hayot uchun, Yangi Oʻzbekiston uchun!” gʻoyasi asosida Oʻzbekiston Respublikasining “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimini yanada takomillashtirish munosabati bilan Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida”gi 2023 yil 11 apreldagi OʻRQ–829-son Qonun ijrosini taʼminlash boʻyicha “Xotin-qizlar va bolalar huquq va erkinliklari – qonun himoyasida” mavzusida davra suhbati oʻtkazildi.

Unda tuman hokimligi bolalarni himoya qilish shoʻba mudiri H.Hakimov, “Nuroniy” jamgʻarmasi tuman boʻlim iraisi B.Olimov, “Kambagʻallikni qisqartirish va bandlikka koʻmaklashish, oila va xotin-qizlar masalalari boʻyicha” boʻlim boshligʻi oʻrinbosari H.Abdullayeva, Xalq deputatlari tuman Kengashi deputati, “Qalmoqon” MFY xotin-qizlar faoli Z.Ashurova, tuman IIB xodimi kata leytenant Sh.Oʻroqov, “Qalmoqon” MFY “Oqila ayollar harakati” yetakchisi, “Buvijonlar maktabi” rahbari H.Ashurova, yoshlar yetakchisi S.Aslonov, faol kitobxonlar, axborot-kutubxona markazi xodimlari ishtirok etdi.

Tadbirni xalq deputatlari tuman Kengashi deputati, “Qalmoqon” MFY xotin-qizlar faoli Z.Ashurova ochib berdi va “Mamlakatimizda xotin-qizlar va bolalar huquqlari, erkinliklari hamda qonuniy manfaatlarini tazyiq va zoʻravonlikdan ishonchli himoya qilishning institutsional hamda huquqiy asoslarini tubdan takomillashtirishga, bolalar orasida nazoratsizlikning va ular tomonidan huquqbuzarliklar sodir etilishining oldini olishga, shuningdek nogironligi boʻlgan bolalarni hamda ota-ona qaramogʻidan mahrum boʻlgan bolalarni davlat tomonidan qoʻllab-quvvatlashga qaratilgan keng koʻlamli ishlar amalga oshirilmoqda” deya mahallada xotin-qizlar va bolalar huquqlari, erkinliklarini himoya qilish boʻyicha olib borilayotgan ishlar yuzasidan maʼlumotlar berib oʻtdi.

“Nuroniy” jamgʻarmasi tuman boʻlimi raisi B.Olimov soʻzga chiqib, Oʻzbekiston Respublikasi Davlat Mustaqilligining 32 yilligi bayrami bilan barchani tabrikladi va Oʻzbekiston faxriylarni ijtimoiy qoʻllab-quvvatlash, shuningdek keksa yoshdagi fuqarolarni davlat tomonidan qoʻllab-quvvatlash tizimi samaradorligini yanada oshirish, ularning mamlakat ijtimoiy-siyosiy hayotida toʻla huquqli ishtirok etishi uchun zarur shart-sharoitlar yaratish, katta avlodning jamiyat, oilalar va mahallalarda tinchlik va osoyishtalikni taʼminlash, shuningdek yosh avlodni xalqimizning koʻp asrlik anʼanalarini hurmat qilish ruhida tarbiyalash ishidagi rolini oshirish borasida “Nuroniy” jamgʻarmasi tuman boʻlimi tomonidan amalga oshirilayotgan ishlar yuzasidan maʼlumotlar berib oʻtdi.

Tuman hokimligi bolalarni himoya qilish shoʻba mudiri H.Hakimov tadbirda soʻz olar ekan, bolalar huquqlari, erkinliklari va qonuniy manfaatlarini ishonchli himoya qilishning institutsional va huquqiy asoslarini tubdan takomillashtirish, bolalar orasida nazoratsizlik va huquqbuzarliklar sodir etilishining barvaqt oldini olish, nogironligi boʻlgan bolalar va ota-ona qaramogʻidan mahrum boʻlgan bolalarni davlat tomonidan qoʻllab-quvvatlash masalalari boʻyicha keng jamoatchilik bilan oʻtkazilgan muhokama natijalari, shuningdek, Inson huquqlari boʻyicha Oʻzbekiston Respublikasining Milliy strategiyasida belgilangan vazifalar haqiada soʻzlab, ota-onalar va bolalar oʻrtasidagi munosabatlar haqida psixologik tushunchalar berib oʻtdi.- Bola huquqlari, erkinliklari va qonuniy manfaatlarini taʼminlash yurtimizda inson huquqlarini muhofazalash borasida muhim qadam boʻldi, -deydi Shofirkon tuman IIB xodimi katta leytenant Sh. Oʻroqov. — Bolalarning huquq va manfaatlarini muhofazalash, ularning sifatli taʼlim olishi, sogʻlom va barkamol boʻlib voyaga yetishi uchun koʻplab dolzarb vazifalar jahon hamjamiyati oldida koʻndalang boʻlib turganidan dalolat beradi. Ushbu muammolarni bartaraf etishning muhim yoʻllaridan biri oʻzaro hamkorlik va hamjihatlikni kuchaytirish, bola huquqlari muhofazasiga oid ishlarni tizimli yoʻlga qoʻyishdir.

“Qalmoqon” MFY “Oqila ayollar harakati” yetakchisi, “Buvijonlar maktabi” rahbari H.Ashurova “Tinch-xotirjam hayotimiz farovon oʻtayotgan kunlarimizning qadriga yetish uchun shukr qilib, eng avvalo hushyor boʻlishimiz lozimligini, ana shu neʼmatlardan ayirmoqchi boʻlgan turli gʻarazli kuchlar, nopok toifalarning nayranglaridan hamisha ogoh boʻlib, ularga munosib javob qaytarish kerak. Inson turli hiyla va aldovlarga aldanib, pirovardida oilasidan, yaqinlaridan, tinchligidan ajralib qolgan kishilar qismatiga nazar solsa bu kunlarimizga qanchalar shukr keltirishligimiz lozimligini anglab yetamiz. Xulosa oʻrnida shuni taʼkidlash lozimki, bugun dunyoda boʻlayotgan notinchliklar, iqtisodiy-siyosiy nizolar, noinsoniy xunrezliklar va millatlararo kelishmovchiliklarni yoki baʼzi mintaqalardagi xalqlarni bir burda nonga zor boʻlayotganlarini koʻrib har bir inson Oʻzbekistondagi tinch-osuda farovon hayot va toʻkin dasturxonimiz uchun Alloh taologa cheksiz shukrlar aytishimiz lozim boʻladi” deya boʻsh vaqtlarni mazmunli tashkil etish uchun yigʻilganlarni kitobxonlikka chorladi.

 “Kambagʻallikni qisqartirish va bandlikka koʻmaklashish, oila va xotin-qizlar masalalari boʻyicha” boʻlim boshligʻi oʻrinbosari H.Abdullaeva soʻzga chiqib, “Oila – jamiyatning birlamchi va muqaddas boʻgʻini boʻlib, oilalarning mustahkamligi, undagi muhitning sogʻlomligi va oila aʼzolari oʻrtasidagi munosabatlarning yaqin va samimiyligi, tarbiya va axloq normalarining barkamolligi jamiyatning ham umumiy qadriyatlarida aks etadi. Boshqacha qilib aytganda, oilaning mustahkamligi jamiyatning ham mustahkamligiga zamin yaratadi. Oʻzbekiston Respublikasida oila, xotin-qizlar va bola huquqlarini, jumladan, aliment undirish bilan bogʻliq qoidalar bir qancha qonun va qonun osti hujjatlari bilan tartibga solinadi. Oʻzbekiston Respublikasi qonunlariga xotin-qizlarni ijtimoiy-iqtisodiy sohada oʻz huquqlari va manfaatlarini amalga oshirishida qoʻllab-quvvatlash masalalarini tartibga soluvchi qonunchilikni xalqaro standartlar asosida takomillashtirishni nazarda tutuvchi, shuningdek bolalar masalalari boʻyicha komissiyalar faoliyatining huquqiy asoslarini mustahkamlab qoʻyuvchi oʻzgartishlar kiritilmoqda” deya qonunda kiritilayotgan oʻzgartishlar haqida soʻzlab berdi.

Prezidentimiz taʼbiri bilan aytganda, xotin-qizlarga eʼtibor hamma vaqt barcha saʼy-harakatlarimiz markazida boʻlishi, hammamizning vazifamizga aylanishi kerak. Oilaga eʼtibor aslida bu oʻzligimizga eʼtibordir.

Uchrashuvda soʻz olganlar Oʻzbekiston Respublikasi Davlat Mustaqilligining 32 yilligi bayrami bilan yigʻilganlarni tabriklab, bugungi mavzu yuzasidan oʻzfikrlarini bildirib oʻtdilar.

NodiraBerdiyeva

”Adolat” SDP Shofirkon tuman Kengashi raisi.