Xotin qizlar va bolalar huquqlari hamda qonuniy manfaatlarini ishonchli himoya qilish tizimi yanada takomillashtiriladi

Mamlakat iqtisodiy, siyosiy va ijtimoiy hayotining barcha jabhalarida xotin-qizlarning faolligini oshirish, ularning taʼlim va kasbiy koʻnikmalar olishi hamda bandligini taʼminlashga har tomonlama koʻmaklashish, tadbirkorlik tashabbuslarini yanada qoʻllab-quvvatlash, joylarda “Ayollar daftari”ni shakllantirish va unga kiritilgan xotin-qizlar muammolari, ehtiyojlari va qiziqishlarini tizimli oʻrganish, tahlil qilish va hal etish borasidagi ishlarni sifat jihatdan yangi bosqichga olib chiqish borasida tizimli ishlar amalga oshirilmoqda.

Xotin-qizlarga oid davlat siyosatining hayotga izchillik bilan tatbiq etilayotgani bu boradagi islohotlar koʻlamini yanada kengaytirmoqda. Shuningdek, ayollarning davlat va jamiyat ishidagi ishtirokini yanada kuchaytirishga alohida eʼtibor qaratib kelinmoqda.

Davlatimiz rahbari Shavkat Mirziyoyev tomonidan oʻtkazilgan har bir yigʻilishlarda xotin-qizlarni qoʻllab-quvvatlash tizimi hamda ularning jamiyatdagi mavqeyini yanada mustahkamlash masalalariga alohida eʼtibor qaratiladi.

Xususan, 2023-yil 28-sentabr kuni Prezidentimiz Shavkat Mirziyoyev tomonidan imzolangan “Aholiga ijtimoiy xizmatlar va yordamlar koʻrsatish tizimini yanada takomillashtirish chora-tadbirlari toʻgʻrisida” gi PQ-319-sonli Qarorning imzolanishi ham xotin-qizlarimizning ijtimoiy himoyasini taʼminlash borasida yangi bir tizim boʻldi.

Qarorga koʻra 2023-yil 15-oktabrdan boshlab 28ta tuman (shahar)da eksperiment tariqasida Oʻzbekiston Respublikasi Prezidenti huzuridagi Ijtimoiy himoya milliy agentligining “Inson” ijtimoiy xizmatlar markazlari ijtimoiy xodimlar guruhlari tomonidan ijtimoiy xizmatlar va yordamlar koʻrsatishning yangi tizimi yoʻlga qoʻyiladi.

Agentlik hamda uning hududiy boʻlinmalari tazyiq va zoʻravonlikka uchragan xotin-qizlar va bolalar bilan ishlash boʻyicha vakolatli organ hisoblanib, ijtimoiy himoyani mahalla darajasida tashkil etish, ijtimoiy xizmat va yordamlarni kompleks yondashuv asosida koʻrsatish, ayollarning ogʻir ijtimoiy ahvolga tushib qolishining oldini olish, shuningdek, ijtimoiy himoyaning manzilliligi va samaradorligini oshirish hamda aholining koʻmakka muhtoj qatlami ijtimoiylashuvini taʼminlash uchun xizmat qilishi shubhasizdir.

Shoira Akbarova,

Xalq deputatlari Sharof Rashidov tuman Kengashi deputati.