Xotin-qizlarning siyosiy-huquqiy madaniyatini oshirishga bagʻishlangan tadbir tashkil etildi

Mamlakatimizda sogʻlom oilani shakllantirish, oilada yuksak darajadagi maʼnaviy-axloqiy muhitni qaror toptirish uchun zarur shart-sharoitlar yaratish, yoshlarni oila qurishga tayyorlash, oila mustahkamligini taʼminlash va uning manfaatlarini himoya qilish, onalik va bolalikni muhofaza qilish va farzandlarni tarbiyalash masalalari davlat siyosati darajasiga koʻtarilgan.

Aytish joizki, ijtimoiy sohada yangilanish jarayonlari muayyan qiyinchiliklarsiz kechmaydi. Fuqarolar oila-nikoh munosabatlarida tez-tez ana shunday muammolarga duch kelishi ham bor gap.

Davlatimiz rahbari ayollarning huquqiy himoyasini kuchaytirish masalasiga alohida urgʻu berib, bugungi kunda tazyiq va zoʻravonlikka uchragan ayollarni himoyaga olish tizimini takomillashtirish zarurati bor ekanini qayd etdi. Haqiqatdan ham tazyiqqa uchragan ayollar 30 kun muddatga alohida himoyaga olinadi, undan keyingi jarayonlarning borishi boʻyicha tizimda boʻshliqlar mavjud. Aynan ana shunday muammolarni oldini olish va bartaraf etish maqsadida ayni davrda mahallalarda ham keng koʻlamli ishlar amalga oshirilmoqda.

Bugun Botir Zokirov mahalla fuqarolar yigʻinida ham xuddi shu masala boʻyicha Samarqand shahridagi mahalla xotin-qizlari, faollari ishtirokida “Siyosiy jarayonlarda xotin-qizlarning oʻrni” mavzusida yigʻilish tashkil etildi. 

Yigʻilish doirasida 30 dan ortiq mahallalarning faol xotin-qizlari, yosh hunarmand ayol-qizlar hamda “Adolat” SDP Samarqand viloyat kengashi vakillari ishtirok etishdi. “Adolat” SDP Samarqand viloyati kengashi tomonidan ham bugunga qadar joylarda mahallalardagi ayollar daftariga kiritilgan va kam taʼminlangan xotin-qizlar muammolari toʻgʻrisida koʻplab rejali ishlar amalga oshirilib kelinmoqda. Shu xususida jarayonda partiyaning viloyat Kengashi matbuot kotibi Gulnafisa Abdimurodova batafsil maʼlumot berib oʻtdi. Shuningdek, Botir Zokirov mahalla fuqarolar yigʻini xotin-qizlar faoli Sohiba Alimova oʻtgan 2022-yil davomida bajargan ishlarining yil sarhisobini ham taqdim etdi.

Tadbir soʻngida hamkor tashkilotlar, xotin-qizlar faolligini oshirish borasida kelgusidagi ishlarini rejalashtirib olishdi.

Sanobar Mirsaidova,
Xalq deputatlari Samarqand
viloyat kengashi deputati.