Xotira bu – tarixdir

Xotira va qadrlash – xalqimizning asriy qadriyatlari, ulugʻ fazilatlaridan. El-yurtining tinchligi, osoyishtaligi, erki va ozodligi uchun kurashgan insonlar hamisha xalqimiz ardogʻidadir. Ana shunday mardlik va jasorat namunasini koʻrsatganlarga, jang maydonlarida jonini fido qilgan bobolarimiz, sabr-bardosh bilan katta qiyinchiliklarni yengib oʻtgan nuroniy momolarimizni sharaflash, xotirasini abadiylashtirish, ularga gʻamxoʻrlik va eʼtibor koʻrsatish mustaqillik yillarida yangicha maʼno-mazmun bilan boyidi.

Bu jihatlar yurtimizda keng nishonlanayotgan Xotira va qadrlash kuniga bagʻishlangan tadbirlarda, ona diyorimizni, xalqimizning ozodlik va istiqlolini, erkin va farovon hayotini mardlik va shijoat bilan himoya qilgan fidoyi yurtdoshlarimizga koʻrsatilayotgan gʻamxoʻrlik, hurmat-ehtiromda yanada yaqqol namoyon boʻlmoqda. Xalqimizga xos boʻlgan mehr-oqibat, muruvvat va himmat barcha bayramlarimiz singari “Xotira va qadrlash kuni” misolida ham yorqin namoyon boʻladi.Inson – hayot gultoji. Uning qadri, hurmati har doim eʼzozga loyiq. Xalqimizga xos xislatlar haqida gap ketsa, albatta, qadr-qimmat, mehr-oqibat kabi fazilatlar tilga olinadi. Keksalarni ardoqlash, koʻmakka muhtojlarning hurmatini joyiga qoʻyish qon-qonimizga singib ketgan fazilat. Ayniqsa, oʻtganlarni xotirlash, aziz otaxon-u onaxonlarning duosini olmoqlik saodati oʻzgacha.Xotira shunday ruhiy-maʼnaviy qudratki, u insonning insonligini anglatuvchi, uni oʻtmish va istiqbol bilan bogʻlab turuvchi buyuk qadriyat, ilohiy qudratdir. Xotirlash – xalq manfaati uchun kurashgan, el-yurt hurmatiga sazovor boʻlgan kishilarni eslashdir. U olamdan oʻtgan ajdodlarni eslashgina emas, asrlar mobaynida Vatan uchun kurashda halok boʻlganlar xotirasini hurmatlash hamdir.

9 may – Xotira va qadrlash kuni munosabati bilan xalqimizning ezgu fazilatlari yanada yorqin namoyon boʻladi. Jumladan partiyamiz tomonidan ham koʻplab loyihalar amalga oshirilib bayram kuni Ikkinchi jahon urushi dahshatlariga guvoh boʻlgan otaxonlarimiz, yuz-u koʻzida nuri bor nuroniylarimiz hamda bemor yotgan yoshi ulugʻ nuroniylarimiz holidan xabar olinadi.

Yoshlikning navqiron chogʻlarini urush olovlarida, janggohlarda oʻtkazib, bugungi tinch va osoyishta hayotimiz uchun kurashgan insonlar jasorati beqiyosdir.

Shu oʻrinda Ikkinchi jahon urushida halok boʻlgan minglab yurtdoshlarimiz xotirasini yod etish, olovli janggohlardan omon qaytgan bobolarimizga, ogʻir kunlarni sabr-bardosh bilan yenggan, mashaqqatli daqiqalarda ham oʻzligini yoʻqotmagan, imoni butun yurtdoshlarimizga hurmat-ehtirom koʻrsatish tom maʼnoda milliy qadriyatga aylandi. Bu hol yoshlarni yurtparvarlik, mehnatsevarlik, ajdodlarining eng yaxshi anʼanalaridan faxrlanish, ularga munosib vorislar boʻlish ruhida tarbiyalashda beqiyos ahamiyatga ega. Kechagi kun saboqlarini, xalqimiz kelajagi yoʻlida jonini fido qilgan insonlarni xotirlash bugungi kunimizni qadrlashga oʻrgatadi. Xotira bu – tarixdir. Zero, oʻtganlarni eslash va ularga istigʻfor aytish, qabrlarini ziyorat qilish va ularning haqlariga duolar qilish hammamizning insoniy burchimizdir.

Muhiba Bababekova,

“Adolat” SDP Samarqand viloyat Kengashi raisi.