Yana bir zamonaviy taʼlim muassasasi foydalanishga topshirildi

Taraqqiyotning tamal toshi ham, mamlakatni qudratli, millatni buyuk qiladigan kuch ham ilm-fan, taʼlim va tarbiyadir. Аna shu hayotiy haqiqat mujassam fikrlarni taʼkidlagan mamlakatimiz Prezidenti Shavkat Mirziyoyev rahbarligida yurtimizda taʼlimni, ilm-fanni rivojlantirish yoʻlida keng qamrovli ishlar amalga oshirilyapti. Buni Furqat tumanida amalga oshirilayotgan islohotlar timsolida yaqqol koʻrishimiz mumkin.

Taʼlim muassasalarini zamon talabi asosida taʼmirlash, yoshlarga keng imkoniyat yaratish maqsadida Furqat tumanidagi taʼlim muassasalari uchun 2023 yilda davlat dasturi asosida qurilish –taʼmirlash ishlariga jami, 14 mlrd 170 mln soʻmdan ortiq mablagʻ ajratildi.

Jumladan, 8-sonli umumiy oʻrta taʼlim maktabiga Investitsiya dasturi doirasida qoʻshimcha 540 oʻrinli oʻquv binosi hamda 12x24 hajmdagi yangi sport zali qurib bitkazildi. Loyiha boʻyicha 7 mlrd 387 mln soʻm mablagʻ ajratilib, oʻquvchilar uchun qulay taʼlim muhiti yaratildi.

Qurilish-taʼmirlash ishlari “Mirzosaodat” MChJ tomonidan sifatli amalga oshirildi.

Shuningdek, oʻquv xonalariga zamonaviy oʻquv mebel jihozlari va kompyuter – texnika vositalari olib kelib, oʻrnatildi.

Maktabda qoʻshimcha dars mashgʻulotlari olib borish uchun imkoniyatlar yaratildi. Oʻquvchilarning sogʻlom ovqatlanishlari uchun oshxona hamda oʻquvchi yoshlarni kasb-hunarga oʻqitish markazi tashkil etildi.

Bundan tashqari, tumandagi yana bir 12-sonli umumtaʼlim maktabiga 360 oʻrinli qoʻshimcha oʻquv binosi qurilmoqda. Joriy yilda Furqat tumanida 900 oʻrinli oʻquvchi oʻrni yaratiladi.

Bularning barchasi Yangi Oʻzbekistonning zukko va zakovatli yoshlarini har tomonlama mukammal rivojlanishi, taʼlim olishi va kasb tanlashi, hech kimdan kam boʻlmagan holda hayot kechirishi uchun mustahkam zamin yaratilayotganligining yorqin misolidir.

“Аdolat” SDP oʻz saylovoldi dasturida ilgari surgan gʻoya va maqsadlar hayotimizning har bir jabhasida oʻz aksini topayotgani bizni quvontiradi. Bugun oʻqituvchi qadri ulugʻlanyapti, oʻqituvchi va oʻquvchi uchun barcha zarur sharoitlar yaratilyapti. Yurtimiz yoshlari xorijiy tillarni oʻrganib, Oʻzbekiston, degan davlatimiz qudratini yanada yuksaltirish yoʻlida xizmat qiluvchi yetuk kadrlar boʻlib yetishlariga qalban ishonamiz.

 Nodir Olimov,

“Аdolat” SDP Furqat tuman Kengashi raisi.