Yangi davr uchun yangi gʻoya va yangi tashabbuslar kerak!

Oʻzbekiston Respublikasi Prezidenti Shavkat Mirziyoyevning lavozimga kirishish tantanali marosimiga bagʻishlangan Oliy Majlis palatalari qoʻshma majlisidagi nutqida mamlakatimizni yanada taraqqiy ettirish, xalqimiz farovonligini taʼminlashga xizmat qiluvchi bir qator tashabbuslar ilgari surildi.

Jumladan, xotin-qizlar va yoshlarni davlat tomonidan ijtimoiy qoʻllab-quvvatlashni yanada kuchaytirish, ularni zamonaviy kasb-hunarlarga oʻqitish, bandligini taʼminlash, bu borada tadbirkorlik uchun yanada qulay imkoniyatlar yaratib, yangi-yangi ish oʻrinlari ochish, aholi daromadlarini koʻpaytirish, keyingi yetti yilda ham davlatimiz siyosatining ustuvor yoʻnalishlaridan boʻlishi aytib oʻtildi.

Aytish joizki, keyingi yillarda mamlakatimizda yoshlarning, xotin-qizlarning huquq va manfaatlarini taʼminlash, ular uchun munosib mehnat va turmush sharoitini yaratib berish, qobiliyat va salohiyatini roʻyobga chiqarish, kuchli fuqarolik jamiyatini shakllantirish, qonun ustuvorligini barqaror taʼminlash, inson huquqlari, erkinliklari va qonuniy manfaatlarini himoya qilish borasida ulkan ishlar amalga oshirildi.

Aholini zamonaviy kasb-hunarlarga oʻqitish, ularga munosib ish oʻrinlarini yaratish, tadbirkorlikni har tomonlama qoʻllab-quvvatlashga qaratilgan tizimli va uzoqni koʻzlagan siyosat natijasida mahallalarda ijtimoiy xizmatlar koʻlamini kengaytirish orqali mamlakatimizdagi 2 million 300 mingdan ziyod muhtoj oilalar, yoshlar, xotin-qizlar, yolgʻiz keksalar va nogironligi boʻlgan shaxslar ijtimoiy himoya bilan toʻliq qamrab olindi.

Shu bilan birgalikda, yoshlar va xotin-qizlarning davlat va jamiyat qurilishidagi rolini yanada kuchaytirish, ularning siyosiy huquqlarini oshirish sohasida qator qonunlar qabul qilindi. Ayniqsa, joriy yilning 30-aprel kuni boʻlib oʻtgan referendumda xalqimiz alohida faollik, katta ishonch bilan yangi tahrirdagi Oʻzbekiston Respublikasi Konstitutsiyasini qoʻllab-quvvatlab ovoz berdi.

Ahamiyatlisi, Bosh qomusimizning yangi tahririga yoshlarga oid qator normalarni birlashtirgan alohida bir bobning kiritilgani, qolaversa, ayol-qizlarimizning jamiyatda faol boʻlishiga, oila va davlat hayotida oʻz oʻrinlarini topishiga zamin yaratishga qaratilgan aniq normalarning belgilanganligi bu yoʻnalishda katta imkoniyatlarni yuzaga keltirdi.

Endilikda, boshlagan islohotlarimizni yangi bosqichga olib chiqish vaqti keldi. Bu borada davlatimiz rahbari oʻz nutqida “Biz oʻtmishdan, kechagi tariximizdan, yoʻl qoʻygan xato va kamchiliklarimizdan zarur xulosalar chiqarib, Oʻzbekistonimizning dunyodagi oʻrni va nufuzini yanada yuksaltirishimiz, Vatanimiz shuhrati va shon-sharafini hamma jabhalarda munosib va mardona himoya qilishimiz kerak. Nega deganda, bugungi keskin raqobat olamida kechagi mezon va yondashuvlar bilan rivojlanib boʻlmaydi. Bugungi zamon – bu kechagi zamon emas”, deb bejizga aytmadi.

Boisi, bugun dunyo har qachongidan shiddatli tarzda oʻzgarib bormoqda. Davrning oʻzi oldimizga yangidan yangi-talablar qoʻymoqda. Ayni vaziyatda mamlakatimizni yanada ravnaq toptirish, aholiga munosib turmush sharoitlarini yaratish jarayonida ayollar va erkaklarning teng huquqliligini taʼminlash, yoshlar, xotin-qizlarning ijtimoiy-siyosiy faolligini oshirish, ularning turli soha va tarmoqlarda oʻz qobiliyat va imkoniyatlarini roʻyobga chiqarishi uchun qulay muhit yaratish, huquq va qonuniy manfaatlarini soʻzsiz taʼminlash,
bu borada mazkur sohaga oid qonun hujjatlarini ishlab chiqish va takomillashtirish keyingi yetti yillik faoliyatimizning ustuvor yoʻnalishlaridan biri boʻladi.

Demak, kelgusi faoliyatimizda xalqimizning ishonchini oqlash, erishgan yutuqlarimizni yangi, yanada ulkan natijalar bilan mustahkamlash uchun barchamizdan yuksak masʼuliyat, fidoiylik va matonat bilan bor kuch hamda imkoniyatlarimizni safarbar etib mehnat qilishimiz talab qilinadi.

Muharram DADAXODJAYEVA,
“Adolat” SDP Toshkent shahar kengashi raisi