Yangi davr yoshlari eʼtiborda

Mamlakat taraqqiyoti birinchi galda yoshlarga bogʻliq. Shu sabab ularni aql-idrokli, bilimli va bugungi kun talablaridan kelib chiqib tarbiyalash lozim. Qolaversa, kelajagimiz egalarining oʻzlariga munosib kasb tanlashi katta ahamiyatga ega.

“Adolat” SDP Andijon viloyat kengashi tashabbusi bilan “Yangi davr yoshlari” mavzusida tashkil etilgan tadbir ayni shu maqsadga qaratildi. Yangi Oʻzbekiston yoshlarining dunyoqarashini shakllantirishga bagʻishlangan maʼruzalarda rivojlanish yoʻlidagi Oʻzbekiston, uning baxtli yoshlari va taraqqiyot odimlari xususida soʻz yuritildi. Yoshlar siyosati borasida amalga oshirilayotgan islohotlar, zamonaviy kadrlar tayyorlash va mavjud imkoniyatlar koʻrsatib oʻtildi.

Maloxatxon Musayeva, “Adolat” SDP Andijon viloyati kengashi raisi oʻrinbosari:

-“Yoshlarga oid davlat siyosatining asoslari toʻgʻrisida”gi qonunga koʻra, 14 yoshdan 30 yoshgacha boʻlgan oʻzbekistonliklar yoshlar toifasiga kiradi. Bu yoshda, qoida tariqasida, mamlakat yoshlari umumtaʼlim maktablari va oliy oʻquv yurtlarida tahsil oladi. Ayni shu davrda oʻz hayot yoʻlini ham belgilaydi. Biz shu sabab yoshlar bilan koʻproq ishlashimiz, kasbga yoʻnaltirishimiz va davlatimizning bugungi siyosatini tushuntirib borishimiz zarur. Bugungi tadbir ishtirokchilari nazarimda bu borada yetarli tushunchaga ega boʻldilar, oʻzlarini qiziqtirgan savollarga javob oldi.

Taʼkidlanganidek, jamiyatning taraqqiyoti uni harakatlantiruvchi kuchiga bogʻliq. Bunday kuch shubhasiz bugunning yoshlari. Uning mustahkamligi esa bizning qoʻlimizda.

Tadbir yakunida bir guruh faol yigit-qizlar esdalik sovgʻalari bilan taqdirlandi.

“Adolat” SDP Andijon viloyati kengashi
Matbuot xizmati.