Yangi hayot uchun, yangi Oʻzbekiston uchun!

Mamlakatimiz Prezidenti Shavkat Mirziyoyevning “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni yuqori saviyada oʻtkazish toʻgʻrisida”gi qarorini ijrosini taʼminlash maqsadida Soʻx bolalar sogʻlomlashtirish oromgohida “Yangi hayot uchun, Yangi Oʻzbekiston uchun!” degan bosh gʻoyani oʻzida mujassam etgan maʼnaviy-maʼrifiy tadbir tashkil etildi.

Xalq deputatlari Soʻx tuman Kengashi, “Adolat” SDP deputatlik guruhi tomonidan oromgohda 4 bosqichda yozgi taʼtilni maroqli oʻtkazayotgan 165 nafar oʻgʻil-qizlarga partiya fidoiylari istiqlol yillarida yurtimizda amalga oshirilgan keng koʻlamdagi islohotlar, yoshlarning bilim olishi va iqtidorini rivojlantirishi yoʻlida yaratilgan sharoitlar haqida soʻz yuritdilar.

Shuningdek, “Har bir kun –bu imkoniyat, har bir kun – bu kelajak uchun poydevor” degan hayotiy shiorning mazmun –mohiyati zamirida jonajon Oʻzbekistonimizda yashayotgan har bir insonning baxt-u- saodati, porloq kelajagi uchun kurashlar, vatan taraqqiyoti uchun intilishlari mujassamligi eʼtirof etildi.

Vatanni madh etuvchi sheʼr va qoʻshiqlar aytib, ona tabiatning betakror suratini moʻyqalami yordamida tasvirlay olgan yosh musavvirlar, sportchi yoshlar, turli iqtidor egalar “Adolat” SDPning maxsus sovgʻalari bilan taqdirlandilar.

“Adolat” SDP

Fargʻona viloyat kengashi Matbuot xizmati.