“Yangi hayot uchun, yangi Oʻzbekiston uchun”

“Adolat” SDP Qorakoʻl tuman Kengashi tomonidan tumandagi 29- maktabda Mustaqilligimizning 32 yilligiga bagʻishlangan “Yangi hayot uchun, yangi Oʻzbekiston uchun” shiori ostida maʼnaviy maʼrifiy tadbir oʻtkazildi.

Bayramona tadbirda partiya tuman Kengashi raisi Nuriddin Ochilov, Xalq deputatlari tuman Kengashi deputati Raʼno Shukrullayeva, “Tojikent” MFY faollari, mahallada yashovchi nuroniylar, xotin-qizlar va yoshlar ishtirok etdilar.

Tadbirni partiyaning tuman Kengashi deputati Raʼno Shukrullayeva kirish soʻzi bilan ochib, avvalo yigʻilganlarni Mustaqilligimizning eng ulugʻ eng aziz bayrami, 32 yilligi bilan tabrikladi. Taʼkidlanganidek, mamlakatimizdagi bunyodkorlik, joʻshqinlikning asosiy sababi, eng avvalo mustaqillik bergan huquq va erkinlik hamda barcha sohalarda amalga oshirilayotgan oqilona islohotlar samarasidir. Mustaqillik yillarida koʻhna tariximiz, boy merosimiz, milliy davlatchiligimiz, muqaddas dinimiz, urf-odat va anʼanalarimiz qayta tiklandi. Bugungi kunda mehr-oqibat, bagʻrikenglik, hamjihatlik kabi olijanob fazilatlar, milliy va umumbashariy qadriyatlarga hurmat, Vatan taqdiri va kelajagiga daxldorlik tuygʻusi yuragimizning tub-tubidan oʻrin oldi.

Tadbir davomida soʻzga chiqqanlar tomonidan bugungi tinch va erkin hayotni qadrlab, shukronalik tuygʻusi bilan yashashga, mustaqilligimizni asrab-avaylagan holda hamjihatlikda taraqqiyotimiz uchun dadil olgʻa borishga daʼvat etildi.

Bayram tadbirida tuman Madaniyat boʻlimi xonandalari tomonidan yangragan kuy-qoʻshiqlar barchaning qalbiga shodlik ulashib, yigʻilganlarni raqsga chorladi.

Mohigul Rahimqulova

“Adolat” SDP Buxoro viloyat Kengashi matbuot kotibi.