Yangi Oʻzbekiston hayotida ishbilarmon ayollarning soni ortib bormoqda

Davlatimiz rahbari Shavkat Mirziyoyev “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni yuqori saviyada oʻtkazish toʻgʻrisida”gi qarorni imzoladi.

Mustaqillik bayramining shukuhi va zavqi oʻzgacha, xalqimiz istiqlolining har bir yilini zafarlar, salmoqli yutuqlar bilan qarshi olmoqda. Bayram mamlakatimizda yashayotgan turli millat va elatlarni bir gʻoya atrofida birlashtirib yangi marralar sari ilhomlantirib kelmoqda.

Bu yilgi mustaqillikning 32 yillik tantanalari “Yangi hayot uchun, yangi Oʻzbekiston uchun” degan bosh gʻoyani oʻzida mujassam qilib, bu oʻz navbatida mamlakatimizda inson qadr-qimmati ulugʻlanishi mustahkamlanib borayotgani ifodasidir.

Xususan, mamlakatimiz hamma yoʻnalish boʻyicha ijtimoiy soha, taʼlim yoʻnalishi boʻladimi, ichki, tashqi siyosatlarda ham juda katta natijalarga erishdi va buning natijasida hozir Oʻzbekistonni dunyo tan olyapti.

Bu yil Oʻzbekiston tarixda alohida muhrlanadi. Chunki, shunday katta siyosiy jarayonlar xalqimizning siyosiy va huquqiy, ijtimoiy faolligida boʻlib oʻtdi yaʼni Yangilangan Konstitutsiyamiz hamjihatlikda qabul qilindi.

Shuningdek, Oʻzbekistonning tarixida xotin-qizlarni taʼriflash juda katta bosqichlarga chiqib, Prezidentimizning qatʼiy irodalari tufayli davlat siyosatining eng asosiy yoʻnalishlaridan biriga aylangan, desak mubolagʻa boʻlmaydi.

Avallari gender tenglik degan atamani aytib bilmaganmiz. Hozirgi kunda gender tenglikning asosiy mazmunini koʻp misollar bilan xalqimizga tushuntirib beryapmiz.

Oʻzbekiston gender siyosatini olib borayotgan yosh davlatlardan biri hisoblanib, gender tenglik siyosatini faol olib bormoqda.

Taʼlim yoʻnalishida xotin-qizlarga juda katta imkoniyatlar yaratilmoqda. Bakalavrda oʻqiyotgan qizlarimizga yetti yilga foizsiz kredit berilishi, foizni esa davlatimiz tomonidan toʻlanishi, bakalavrni tugatgandan keyin ishga kirib olti oygacha oʻzini oʻnglab oyoqqa turib ketgandan keyin yettinchi oydan boshlab mazkur kreditni toʻlashlari toʻgʻrisidagi ustuvor gʻoyalar xotin-qizlar uchun katta imkoniyatlar hisoblanadi.

Yana bir jihat bir xil kasbda 5 yil ishlagan ayollar ham oliy oʻquv yurtlariga qabul qilinadigan boʻldi. Xotin-qizlar uchun Prezidentimiz tomonidan eʼtibor shart-sharoitlar yaratilayotgani natijasida oʻz kasbining mohir ustalari, ishbilarmon va rahbar ayollarning soni kundan kunga ortib bormoqda.

Bir soʻz bilan aytganda, biz ayollar ozod va obod yurtda yaratilayotgan imkoniyatlardan keng koʻlamda foydalanib, yangi Oʻzbekistonimizning rivoji uchun bar kuch va gʻayratimizni safarbar etamiz.

Saodat Masharipova,

“Adolat” SDP Bogʻot tuman Kengashi “Ayollar qanoti” raisi.