Yangi Oʻzbekiston kelajagi uchun kamarbastamiz

Bu yilgi bayram tantanalariga ham mana sanoqli kunlar qoldi. Mustaqilligimizning oʻttiz ikki yillik shodiyonalariga ham tayyorgarlik avj pallada. Joylardagi taraddudlar, maʼnaviy-maʼrifiy tadbirlarning yuqori saviyada oʻtkazilayotganligi ham darak bermoqda.

Yangi Oʻzbekistonimizni jahonga tarannum qilish boʻyicha muhim natijalarni qoʻlga kiritayotganimiz, bu yutuqlar xalqaro jamoatchilik tomonidan eʼtirof etilayotgani, eng asosiysi, vatandoshlarimizning ongu tafakkuri, dunyoqarashi oʻzgarib, ular islohotlar samarasini kundalik hayotida his qilib yashayotganini alohida taʼkidlash zarur.

Bugun mamlakatimizda inson va uning qadri ulugʻlanib, shaʼni va gʻururini yetakchi oʻringa olib chiqish ustuvor vazifamizga aylangan. Yurtimizda tinchlik va barqarorlikni saqlash, davlatimizning hududiy yaxlitligi va boʻlinmasligi, sarhadlarimiz daxlsizligini taʼminlash, millatlararo totuvlik, diniy bagʻrikenglik va hamjihatlikni mustahkamlashga intilish koʻp millatli xalqimizni yanada birlashtiradigan, yuksak marralarga safarbar etadigan beqiyos kuchga aylanib bormoqda.

Bugun har bir yurtdoshimiz mana shu bunyodkorliklar, yaratuvchanliklar tashabbuskorligiga aylanmoqda, desak mubolagʻa emas. Chunki, bizning vatanimiz buyuk istiqlolga yuz tutgan holda dadil odimlamoqda. Yangi Oʻzbekistonning har bir fuqarosi mana shu erkinlik nafasidan bahra olmoqda. Yurtdoshlarimiz dilida bu kunlarga shukronalik, ishonch tuygʻulari ortib bormoqda. Demak, bunday nurli boʻstonni qadriga yetmoq, uni yuksalishi yoʻlida xizmat qilmoq har birimiz uchun juda sharafdir. Bu yoʻlda ayniqsa, biz yoshlar kamarbasta boʻlgan holda tinchlikni asrab-avaylashga unga munosib avlod boʻlishga intilamiz.

Odomboy Karimov,

      “Adolat” SDP Qoʻshkoʻpir tuman Kengashi raisi.