Yangi Oʻzbekiston — yoshlar mamlakati

Joriy yilning 24-fevral kuni Oʻzbekiston Respublikasi Prezidenti Shavkat Mirziyoyev viloyatimizga tashrif buyurdilar. Bu tashrif davomida davlatimiz rahbari viloyatni iqtisodiy-ijtimoiy masalalari yuzasidan yigʻilish oʻtkazdi. Shuningdek, Prezidentimiz viloyatimizdagi oltita yangi korxonani ishga tushirish marosimida ishtirok etdilar. Bundan tashqari, Qashqadaryo viloyatining energiya taʼminotini yaxshilash choralari masalasi ham Prezident ishtirokida koʻrib chiqildi. Chiroqchi va Nishon tumanlarida uchta quyosh elektr stansiyasini ishga tushirish yuzasidan koʻrsatmalar berildi.

Davlatimiz rahbari bandlik masalasiga alohida eʼtibor qaratib, bu boradagi vazifalarga ham birma-bir toʻxtaldi. Xususan, Prezidentimizning bu borada imzolagan Qarori keng imkoniyatlar yaratdi. Ayni paytda viloyatdagi 80 ta mahallada 6 mingdan ziyod aholi kasanachilik bilan shugʻullanadi.Sanoat zonalarida boʻsh turgan maydonlarda 50 ta yangi loyihani amalga oshirib, 2 mingta ish oʻrni yaratish yuzasidan topshiriqlar berildi.

Shu kuni Prezidentimiz Qarshi shahridagi Oliy harbiy aviatsiya bilim yurtida ham boʻlib, oʻquv mashgʻulotlari va harbiy aviatsiya parvozlarni koʻzdan kechirdilar. Oliy harbiy aviatsiya bilim yurti mutasaddilariga bugungi xalqaro maydonda roʻy berayotgan xavf-xatarlardan kelib chiqib, havo mudofaasini yangi pogʻonaga koʻtarish hamda xorijiy muassasalar bilan qoʻshma dasturlarni amalga oshirish boʻyicha koʻrsatma, yoʻl-yoʻriqlar berdilar.

Men Davlatimiz rahbarining vohamiz taʼlim muassasalarida boʻlib, yoshlar bilan qilgan samimiy suhbatlaridan ochigʻi juda taʼsirlandim. Ha, Oʻzbekiston yoshlar mamlakati. Negaki, bu yurtda biz yoshlar uchun muhtaram Yurtboshimiz rahnamoligida barcha sharoitlar yaratilgan. Biz bu imkoniyatlardan unumli foydalanib, mamlakatimiz taraqqiyotiga munosib hissa qoʻshamiz. Vatanimizga munosib farzand boʻlishga harakat qilamiz.

Sardor Toʻxtayev,
Oliy Majlis Qonunchilik palatasi huzuridagi
“Yoshlar parlamenti” aʼzosi,
Qashqadaryo viloyat
“Yosh adolatchilar” qanoti faoli.