Yangi Oʻzbekistonda el aziz, inson aziz

Oʻzbekistonning “mustaqil” degan sharafli nomga ega boʻlganiga 32 yil toʻldi. 32 yil – shunchaki osongina tilga olinishi mumkin, ammo qilingan ishlar, amalga oshirilgan iqtisodiy-ijtimoiy oʻzgarishlar, kuzatilayotgan yangilanishlar, bunyodkorlik ishlari esa oʻzbek xalqidan matonat, sabr va kuchli mehnatni talab qildi. Shubhasiz, bu kuchli mehnat va intilish yangi Oʻzbekistonni kashf etdi. Erkin hamda farovon hayotimizning asosi boʻldi.

Mustaqillik haqiqatdan ham buyuk voqea boʻlib hayotimizga kirib keldi. Bu sananing buyukligi shundaki, mustaqillik Vatanimiz tarixida yangi davlat, yangi jamiyat barpo etish yoʻlini ochib berdi. Oʻtgan qisqa vaqt ichida jamiyatimizning siyosiy-huquqiy va ijtimoiy-iqtisodiy qiyofasi yangilandi.

Mustaqillik yillari ayniqsa, soʻnggi yetti yilda mamlakatimizda amalga oshirilayotgan izchil islohotlar aholining yashash sharoitini tubdan yaxshilash, ijtimoiy muammolarni adolatli hal etish, ayniqsa, insonni eʼzozlash, uning huquq va erkinliklarini taʼminlashga qaratildi. Mamlakatda inson qadr-qimmati bosh maqsadga aylandi.

Yetti yil oldin boshlangan bu boradagi amaliy ishlar samarasi bugun xalqimizning turmush tarzida, ongu tafakkuridagi oʻzgarishlarda, hayotida namoyon boʻlayotir. Quvonarlisi, shu davrda insonning huquq-erkinliklari va manfaatlari oliy qadriyat sifatida belgilanib, amalda unga rioya etila boshlandi. Qisqasi, oʻtgan yetti yil Oʻzbekistonda inson qadrini, shaʼnini, huquqlarini tiklash davri boʻldi.

“Xalq davlat idoralariga emas, davlat idoralari xalqimizga xizmat qilishi kerak” degan tamoyil barcha rahbarlar, vazirlar va hokimlarning faoliyat dasturiga aylandi. Mutasaddi rahbarlarning chekka, sharoiti ogʻir tumanlarga borishi, oddiy odamlarning xonadoniga kirishi, inson qalbiga yorugʻlik olib kirdi. Insonga umid bagʻishladi, taʼbir joiz boʻlsa, ishonch berdi.

Darhaqiqat, bugun Oʻzbekiston har bir sohada oʻzgarish qilmoqda. Taʼlim tizimida yangilanishlar kuzatilayotgan boʻlsa, tibbiyotda yangi gʻoyalar kashf etilmoqda, tadbirkorlik faoliyatida esa imkoniyatlar yaratilmoqda. Shubhasiz, bularning barchasi xalqimiz manfaatlarini oʻylagan holda ularning ishonchini oqlash, rozi qilish, ogʻirini yengil qilishdan iboratdir.

Hozir Vatanimizning qaysi hududida boʻlmang, u yerlarda yangi-yangi korxonalar, zamonaviy uy-joylar, ilm-fan, taʼlim, tibbiyot, madaniyat va sport maskanlari, ravon yoʻl va koʻpriklar, bogʻ va xiyobonlar barpo etilayotganining guvohi boʻlasiz.

Biz bugun mustaqil davlat va jamiyat qurish, xalqimiz uchun hech kimdan kam boʻlmagan farovon hayot barpo etish yoʻlida tarixan qisqa davrni, bir necha yillar, balki asrlarga teng keladigan yoʻlni bosib oʻtdik. Har bir muvaffaqiyat, har bir marra zamirida esa davlatimiz rahbarining uzoqni koʻzlab olib borayotgan odilona siyosati mujassam.

Bugun faxr bilan aytish mumkinki, Yangi Oʻzbekistonda insonni eʼzozlash, uning huquq va erkinliklarini himoya qilish, aholi bandligi va real daromadlarini izchil oshirib borishga qaratilgan amaliy ishlar salmogʻi yanada oshdi. Inson qadr qimmati Prezident, davlat darajasida eʼzozlanmoqda.

Bir soʻz bilan aytganda, Yangi Oʻzbekistonni barpo etish, Uchinchi Renessans poydevorini yaratish oson emas. Prezidentimiz aytganidek, bunday ulugʻ vazifaning sharti va mezonlari koʻp. Ammo eng muhim va hal qiluvchi omil – bu demokratik islohotlar yoʻlidir. Shu bois xalqimiz manfaatiga toʻla javob beradigan bu yoʻldan hech qachon ortga qaytmaymiz. Qanchalik qiyin boʻlmasin, faqat oldinga qarab boramiz.

32 yil davomida har bir erishilgan yutuq zamirida xalqimizning matonati, sabri, jasorati, mehnati yotganligi, bu shunchaki emas, balki qilingan ulkan orzu-umidlar asosida bunyod etilganligi tilga olinar ekan, shubhasiz, barchamizning gʻayratimizga gʻayrat qoʻshgan holda faxr-iftixor tuygʻusini his eta olishimizda asos boʻldi.

Prezidentimiz taʼbiri bilan aytganda, mustaqillik va istiqlol yoʻlidan hech qachon qaytmay, oʻz maqsadlarimizga, albatta, yetamiz, kelajagi buyuk Oʻzbekistonni barchamiz birgalikda bunyod etamiz!

Maqsud Hamidov,

“Adolat” SDP Buxoro viloyat Kengashi raisi.