Yangi Oʻzbekistonda yuksalish shukuhi

Mamlakatimiz boʻylab kezayotgan bayramona shukuh har qachongidan ham zavqli, har qachongidan ham maroqli, desa xato boʻlmaydi. Chunki, kundan kunga chiroy ochib, yuksaklik sari yuz tutayotgan mamlakatimiz xalqining yuzida tabassum, ertangi kunga boʻlgan ishonch, dadil qadamlar, baland parvozlar ogʻushida nafas olayotgani hech kimga sir emas.

Darhaqiqat, Davlatimiz rahbari tashabbusi bilan mamlakatimizda soʻngi yillarda   koʻzni quvontiradigan islohotlar amalga oshirilmoqda. Birgina Xorazm vohamiz misolida soʻz yuritadigan boʻlsak, shu besh yil ichida yurtimiz jamoli har bir kishi qalbida minnatdorlik tuygʻusini shakllantirmoqda.

Zamonaviy osmon oʻpar binolarning qad koʻtargani, shahar va qishloqlar orasidagi farq anchagina ijobiy tomonga siljib borayotgani, koʻplab yaroqsiz holatga kelib qolgan ichki va markaziy yoʻllar oʻrnida keng va ravon yoʻllarning barpo etilgani, Urganch shahar markazida buyuk sarkarda Jaloliddin Manguberdining   salobatli haykalining oʻrnatilishi, “Amir Temur” istirohat bogʻining zamon talablari asosida shakllangani, “Al Xorazmiy” shaharchasiga tamal toshi qoʻyilib, qurilish ishlari olib borilayotgani bularga koʻplab misollarni sanab oʻtish mumkin.

Ayniqsa,   shahar markazida joylashgan “Avesto” bogʻining zamon talablari asosida taʼmirlanib Mustaqilligimizning 32 yillik bayramiga toʻyona boʻlgani, kuni kecha mustaqillik bayramini katta shodiyona bilan yangilangan mazkur majmuada oʻtkazilgani tarixiy ahamiyatga ega boʻldi.

Shuningdek, aholimizning turmush sharoiti kundan-kunga yaxshilanib borayotganini xizmat safarimiz davomida guvohi boʻlmoqdamiz.

Qaysi sohaga qaramaylik yangilanish, oʻsish, rivojlanish kuzatiladi. Fuqarolarimizning huquqiy, siyosiy, ijtimoiy faolliging ortib, yoshlarning bilim va tafakkuri sayqallanib, umrguzaronlik qilayotgan nuroniylarning shukronalik tuygʻulari ortib borayotganidan, muxtasar aytganda Yangi Oʻzbekistonimizda yuksalish shukuhi hukm surayotganidan koʻngling ravshan tortadi, ertaga boʻlgan ishonch ortadi va har birimizni yangi marralar sari undaydi.

                                                                                                      Zamira Abdullaeva,

                                    “Adolat” SDP Xorazm viloyat Kengashi matbuot kotibi,

                                                  Oʻzbekiston jurnalistlar ijodiy uyushmasi aʼzosi.