Yangi Oʻzbekistonni barkamol yoshlarimiz barpo etadi

Yoshlar jonajon vatanimizning kelajagini, salohiyatini belgilovchi muhim ijtimoiy qatlam sanaladi. Zero, har bir mamlakatning holati, taqdiri va istiqboli unda yashayotgan yoshlarning bilimi, maʼnaviy dunyoqarashi, ongliligi darajasi bilan belgilanadi. Darhaqiqat, yoshlar jamiyatning ertangi ongli kelajagi, uning faol aʼzosi, aniqroq aytadigan boʻlsak, istiqbolimizning mustahkam vorislaridir. Shuning uchun ham yoshlar davlat va jamiyat tomonidan doimiy eʼtiborda boʻladi. Bu haqda Oliy Majlis Qonunchilik palatasi va senatning qoʻshma majlisida Oʻzbekiston Respublikasi yangi saylangan Prezidentining lavozimiga kirishishiga bagʻishlangan marosimdagi maʼruzasida ham alohida taʼkidlandi.

Ha, yoshlar mamlakatimiz aholisining qariyb 60 foizini tashkil etadi. Ularning oʻqishi, hayotda munosib oʻrnini topishi, uy-joyli boʻlishi, bandligini taʼminlash davlatimizning eng ustuvor vazifalaridan biri hisoblanadi. Davlatimiz rahbari Oʻzbekiston yoshlariga murojaat qildi:

“Aziz oʻgʻil-qizlarim, bugun tarixning oʻzi, zamonning oʻzi sizlarning oldingizda beqiyos imkoniyatlar ochmoqda. El-yurt koriga avvalo kim yaraydi? Albatta, sizlar!

Yangi Oʻzbekistonni, Uchinchi Renessansni kim barpo etadi?

Albatta, sizlar! Yurtimiz, xalqimizni kelajakda kim rozi qiladi? Albatta, sizlar! Xalqimiz, Vatanimiz sizlarga ishonadi. Sizlar Oʻzbekiston tarixiga oltin harflar bilan yoziladigan buyuk ishlarni amalga oshirishga qodirsiz”.

Darhaqiqat, bugungi kunga kelib yoshlar   safiga yurtimizdagi, chet eldagi nufuzli oliygohlarda oʻqigan, yirik kompaniyalarda ishlagan qancha-qancha salohiyatli yoshlar kirib kelmoqda. Ulardan umidimiz katta. Mamlakatimizning bundan keyingi buyuk rivojlanishi yoʻlida, yuksak natijalarni qoʻlga kiritishda oʻz hissalarini qoʻshadilar.

Mamlakatimizning barcha shahar va qishloqlarida boʻlgani kabi viloyatimizda ham yoshlar bandligini taʼminlash, ilm olishi uchun yetarli imkoniyatlar yaratish borasida keng koʻlamli ishlar amalga oshirilyapti. Birgina shu yilning oʻzida oʻnlab yuzlab oʻgʻil-qizlarimiz umumtaʼlim oʻrta maktablarini tamomlab mustaqil hayotga qadam qoʻydi. Partiyamiz faollari tegishli hamkor tashkilotlar bilan ularni hayotda oʻz oʻrinlarini topib olishlari uchun har tomonlama koʻmak beryapmiz. Kasb –hunar oʻrganishni istaganlarga monomarkazlarga oʻqishga yoʻllanmalar berilyapti. Barcha tuman hokimliklari bilan kelishgan holda hosildan boʻshagan yerlar yoshlarga ijaraga berildi. Yakka tartibda tadbirkorlik bilan shugʻullanmoqchi boʻlganlarga esa subsidiya, kredit olishlariga koʻmaklashyapmiz.

Umuman olganda, Oʻzbekiston yoshlar mamlakati. Prezidentimiz boshchiligida yoshlarimizning farovon kelajagi uchun barcha imkoniyatlar yaratilyapti.               

Ulug‘bek Ashirov,

    “Adolat” SDP  Qashqadaryo viloyat Kengashi faoli.