Yangi O‘zbekistonni qurishda yangilanayotgan Konstitutsiyaning ahamiyati

Oliy Majlis Qonunchilik palatasi deputati Dilshod Xamzayev G‘uzor tumanidagi Gulshan MFY da joylashgan 18-maktabda fuqarolar bilan targ‘ibot tadbirida ishtirok etdi. Unda deputat yangilanayotgan Konstitutsiyamiz moddalaridagi o‘zgartirishlar xususida fikr mulohaza yuritdi.

-Yurtimizda kechayotgan Konstitutsiyaviy islohotlar tabiiy rivojlanish natijasi bo‘lib, millat va xalq sifatida keyingi harakatlarimizni aniqlab olishimiz uchun o‘ta ahamiyatlidir,-dedi Dilshod Xamzayev.

- Albatta, qonun ustuvorligi ta’minlangan, adolatli jamiyat qurish yo‘lida ulkan qadamdir.

Tadbirda deputat   Konstitutsiyada har kimning mehnati uchun hech qanday kamsitishlarsiz hamda mehnatga haq to‘lashning belgilangan eng kam miqdoridan kam bo‘lmagan tarzda adolatli haq olish huquqi kafolatlanayotgani xususida to‘xtaldi. Mazkur normaning Konstitutsiyada belgilanishi fuqarolarning ish haqlari miqdori shunchaki emas, aynan ularning munosib turmush kechirishini ta’minlashda, pirovard natijada aholi turmush darajasini yaxshilashda va mamlakatimizda ijtimoiy adolatni ustuvor qadriyatga aylantirishda  muhim ahamiyatga egaligini ta’kidladi. Shuningdek deputat Konstitutsiyaning inson erkinliklari va haq huquqlarini ta’minlash borasida belgilangan moddalari yuzasidan ham tushuntirish berdi.

Konstitutsiyada O‘zbekiston huquqiy davlat ekanligini alohida belgilash davlat o‘z faoliyatini jamiyat va fuqarolarning yashash tarzini faqat Konstitutsiya va qonunlar asosidagina amalga oshirishini ta’minlashini e’tirof etdi. Deputat Konstitutsiya loyihasining boshqa normalarda ham huquqiy davlat prinsipini ro‘yobga chiqarishga qaratilgan mexanizmlar va kafolatlar mustahkamlanayotganini e’tirof etdi.Tadbirda fuqarolardan tushgan savollarga Dilshod Xamzayev atroflicha javob berdi. Targ‘ibot tadbiri yakunida deputat ishtirokchilarni 30-aprel kuni bo‘lib o‘tadigan referendumda faol ishtirok etishga chaqirdi.

Shodmon Eshboyev,

deputat yordamchisi.