Yangi Oʻzbekistonning kelajagiga ishonch ortdi

Mamlakatimizda yoshlarning boʻsh vaqtini mazmunli oʻtkazish, kitob oʻqishga, badiiy adabiyot, tasviriy sanʼat, sport va ijodga boʻlgan qiziqishini oshirish, ular oʻrtasida sogʻlom turmush tarzi koʻnikmalarini shakllantirishga qaratilgan keng koʻlamli ishlar olib borilmoqda. Andijon mashinasozlik instituti talabalar yotoqxonasida tashkil etilgan tasviriy sanʼat asarlari koʻrgazmasi ana shu yoʻnalishdagi ishlardan biridir. Mazkur tadbirda andijonlik “Yosh adolatchi”-talabalar ham faol ishtirok etdi.  

Musavvirlarning ona Vatan, tabiat manzaralari, yoshlik shijoati, yurtimizdagi bunyodkorlik jarayonlari tasvirlangan oʻziga xos asarlari ishtirokchilarning tasviriy sanʼatga qiziqishini oshirish bilan birga, ularning maʼnaviyatini, tafakkurini, jamiyatdagi jarayonlarga daxldorlik hissini kuchaytirishga xizmat qilmoqda.

Bekzod Mutallibov, “Yosh adolatchi”, talaba:

-Bugun biz yoshlar uchun barcha sharoitlar yaratilgan. Bunga javoban bilim olish bilan birga oʻz iqtidorimizni, tashabbuskorligimizni koʻrsatishimiz lozim. Bugungi tadbir maʼnaviyatimizni yuksaltirish bilan birga bizni faollikka chaqirdi. Yangi Oʻzbekiston, yurt tinchligi va baxtli hayot tasvirlari kelajakka boʻlgan ishonchimizni yanada oshirdi.

“Adolat” SDP Andijon viloyati kengashi

Matbuot xizmati.