Yangi tahrirdagi Konstitutsiya, unda belgilanayotgan normalari yuzasidan targʻibot tadbiri tashkil etildi

Oliy Majlis Qonunchilik palatasi deputati Muzaffara Abdiyeva ishtirokida Pastdargʻom tuman Tibbiyot birlashmasi xodimlari bilan 30-aprel kuni boʻlib oʻtishi kutilayotgan referendumni munosib tarzda oʻtkazish va Yangi tahrirdagi Konstitutsiya, unda belgilanayotgan normalari yuzasidan targʻibot tadbiri tashkil etildi.

Dastlab deputat tibbiyot xodimlari bilan uchrashib, Yangi tahrirdagi Konstitutsiyaning mazmun-mohiyati, kiritilayotgan yangi normalarning ahamiyati haqida tushuntirishlar berdi.

Shundan soʻng, aynan tibbiyot sohasidagi belgilanayotgan qonuniy normalar haqida ham alohida toʻxtalib oʻtildi.

Taʼkidlanganidek, yangi tahrirdagi Konstitutsiyada aholi kafolatlangan bepul tibbiy xizmatlardan foydalanishi mustahkamlanayotganligi, fuqarolar zarur paytlarda sifatli tibbiy xizmat uchun davlatga suyana olishi alohida aytib oʻtildi. Shunga koʻra, yangi tahrirdagi Konstitutsiyada fuqarolar davlat hisobidan tibbiy yordamning kafolatlangan hajmini olishga haqli ekanligi belgilanmoqda. Bu juda muhim ijtimoiy kafolat ekanligi qayd etildi. Chunki aholining ayrim qatlamlari pulli asosda yoki xususiy shifoxonalar xizmatidan foydalanishga imkoniyati yetmasligi mumkin. Ana shunday vaziyatda davlat oʻz fuqarosini kafolatlangan tibbiy xizmat bilan taʼminlash majburiyatini oʻz zimmasiga olmoqda. Konstitutsiyadan oʻrin olayotgan ushbu modda aynan mazkur jihatlarni koʻzda tutadi.
Shuningdek, aholi salomatligini asrash bilan bogʻliq normalar 4 barobar koʻpaytirilmoqda. Bu aholi sogʻligʻini ishonchli muhofaza qilish, onalar va bolalar oʻlimi, yuqumli kasalliklar tahdidini oʻz vaqtida bartaraf etish imkonini beradi.

Tadbir soʻngida qatnashchilar tomonidan berilgan savollarga batafsil va atroflicha javoblar berildi.
Deputatning hududdagi uchrashuvlari davom etmoqda.