Yangiariq tuman Kengashi sessiyasiga masala kiritildi

Sessiya kun tartibida tumanda investitsiyalarni jalb qilish va investitsiya loyihalarini amalga oshirish borasida “Adolat” SDP Yangiariq tuman Kengashi deputatlik guruhi tomonidan olib borilgan oʻrganish ishlari hamda bildirilgan fikr va mulohazalar, olib borilayotgan ishlar toʻgʻrisida tuman hokimining oʻrinbosari, investitsiyalar va tashqi savdo boʻlimi boshligʻining hisobotini hamda bildirilgan fikr va mulohazalarni inobatga olib, Oʻzbekiston Respublikasining “Mahalliy davlat hokimiyati toʻgʻrisida”gi qonunning 6, 24 moddalariga asosan, xalq deputatlari tuman Kengashining quyidagicha qarori qabul qilindi.

“Adolat” SDP Yangiariq tuman Kengashi tomonidan tumanda investitsiyalarni jalb qilish va investitsiya loyihalarini amalga oshirish borasida olib borilayotgan ishlar toʻgʻrisida tuman hokimining oʻrinbosari, Investitsiyalar va tashqi savdo boʻlimi boshligʻi A.Doʻschanovning hisoboti maʼlumot uchun qabul qilindi.

Tuman hokimining birinchi oʻrinbosari O.Saidov, Investitsiyalar va tashqi savdo boʻlimi boshligʻi A.Doʻschanov tegishli mutasaddi tashkilotlar bilan birgalikda, tumanda raqobatbardosh tayyor mahsulotlar ishlab chiqarish hajmlarini oshirish, iqtisodiyot tarmoqlariga toʻgʻridan-toʻgʻri xorijiy investitsiyalar va yuqori texnologiyalarni keng jalb qilish, investitsiya loyihalarining ijtimoiy-iqtisodiy samaradorligini taʼminlash, shu asosda yuqori daromadli ish oʻrinlarni yaratish choralarini koʻrish masalasi yuklatildi. Shuningdek, hududiy va xorijiy investitsiya loyihalarining oʻz vaqtida va sifatli bajarilishi ustidan doimiy ravishda tizimli monitoring va nazoratni olib borish, joriy yil yakuniga amalga oshirilishi rejalashtirilgan investitsiya loyihalarini oʻz vaqtida ishga tushirilishi va yangi ish oʻrinlarni yaratish choralarini koʻrish vazifasi berkitildi.

Mazkur qaror ijrosini nazorat qilish xalq deputatlari tuman Kengashining mahalliy byudjet, iqtisodiy islohotlarni amalga oshirish, turizm, investitsiyalar va tadbirkorlikni rivojlantirish masalalari boʻyicha doimiy komissiya zimmasiga yuklatildi.

Kun tartibidagi masala yuzasidan qabul qilingan qaror amaliyotga yoʻnaltirildi.

                                                                                            Zamira Abdullaeva,

            “Adolat” SDP Xorazm viloyat Kengashi matbuot kotibi.