Yangilanayotgan Konstitutsiya - bizning kelajagimiz!

Andijon qishloq xoʻjaligi va agrotexnologiyalar institutida “Biz yangi Oʻzbekistonning baxtli yoshlarimiz!” shiori ostida maʼnaviy-maʼrifiy targʻibot tadbiri boʻlib oʻtdi. Oliy Majlis Qonunchilik palatasi deputati Mavluda Adhamjonova, mahalliy kengash deputatlari, faol yoshlar va yetti ming nafardan ortiq talabalar ishtirokidagi mazkur tadbir yangilanayotgan Konstitutsiya va unda yoshlarga boʻlgan eʼtibor mavzusiga bagʻishlandi.

Tadbir davomida Bosh qomusimizga kiritilayotgan oʻzgartishlarning mazmun-mohiyati, taʼlim rivojiga doir muhim jihatlar xususida soʻz bordi. Bosh qonunimiz yangi jamiyat barpo etish yoʻlidagi yutuq va marralarimizning huquqiy poydevori – kelajagimizning ishonchli kafolati boʻlishi, yoshlar masalasida kiritilayotgan moddalar har bir yigit-qizning kelajagi ekanligi taʼkidlandi.

Mavluda Adhamjonova, Oliy Majlis Qonunchilik palatasi deputati:

-30-aprelʼ kuni boʻlib oʻtadigan referendumda andijonlik yoshlar faol ishtirok etishligini bildirmoqda. Bunga yetarli asos bor. Davlatimiz tomonidan kelajagimiz egalariga boʻlgan eʼtibor va yaratilgan imkoniyatlardan ularning har biri foydalanmoqda. Yangilanayotgan Konstitutsiyamiz bu borada yanada mustahkam asosga aylanadi.

Sardorbek Qosimov, xalq deputatlari Andijon tuman kengashi deputati:

-Oʻzbekiston — yoshlar mamlakati. Yangi Qomusimizning 79-moddasida “Davlat yoshlarning shaxsiy, siyosiy, iqtisodiy, ijtimoiy, madaniy, ekologik huquqlari himoya qilinishini taʼminlaydi, ularning jamiyat va davlat hayotida faol ishtirok etishini ragʻbatlantiradi. Davlat yoshlarning intellektual, ijodiy, jismoniy va axloqiy jihatdan shakllanishi va rivojlanishi uchun, ularni taʼlim olishiga, sogʻligʻini saqlashda, uy-joyga, ishga joylashishga, bandlik va dam olishga boʻlgan huquqlarini amalga oshirish uchun shart-sharoitlar yaratadi” deyilganining zamirida yoshlarning huquqiy va ijtimoiy muhofaza qilish, isteʼdodini qoʻllab-quvvatlash turganligiga amin boʻlamiz.

Tadbir ishtirokchilarning tengdoshlariga qarata faol chaqiriqlari bilan yakunlandi.

“Adolat” SDP Andijon viloyat kengashi
Matbuot xizmati.