Yangilanayotgan Konstitutsiyada yoshlar huquq va manfaatlari kengaymoqda

Oʻzbekiston “Adolat” SDP Qashqadaryo viloyat va Qarshi shahar Kengashi bilan hamkorlikda Yuridik texnikumi tadbirgohida “Konstitutsiyaviy islohotlar –adolat tantanasi” mavzusida targʻibot tadbiri boʻlib oʻtdi. Unda Xalq deputatlari Qarshi shahar Kengashi deputatlari, viloyat va shahar Kengashi xodimlari, oʻqituvchilar, talaba yoshlarga yangilanayotgan Konstitutsiya normalari haqida keng tushuncha berildi.

— Yangilanayotgan Konstitutsiyaga muvofiq, fuqarolar davlat taʼlim tashkilotlarida tanlov asosida davlat hisobidan oliy maʼlumot olishga haqli, ekanligi aniq belgilab qoʻyilmoqda,-dedi “Adolat” SDP viloyat Kengashi bosh mutaxassisi Dilrabo Choriyeva.- 2017 yilga qadar oliy taʼlim muassasalarida grant oʻrinlari soni faqat qisqarib keldi. Soʻnggi besh yil ichida, aksincha grantlarni koʻpaytirish yoʻlidan borildi. Xususan, oʻtgan davrda oliy taʼlimga ajratilgan davlat grantlari soni 75 foizga hamda ehtiyojmand oilalar farzandi boʻlgan xotin-qizlar uchun davlat grantlari soni ikki baravarga oshirildi, shuningdek, nodavlat oliy taʼlim muassasalarida mutaxassislarni tayyorlashga davlat granti ajratish amaliyoti yoʻlga qoʻyildi. Mazkur konstitutsiyaviy qoidaning belgilanishi bu boradagi ijobiy yoʻnalish doimo saqlab qolinishini, davlat oliy taʼlim muassasalarida grant oʻrinlari yoʻqolmasligini taʼminlashga xizmat qiladi.

Konstitutsiyaviy qonunga muvofiq oliy taʼlim tashkilotlariga akademik erkinlik, oʻzini oʻzi boshqarish, tadqiqotlar oʻtkazish va oʻqitish erkinligi huquqi berilmoqda. Oliy taʼlim tizimi bilan bogʻliq masalalarning Konstitutsiya darajasida belgilanayotgani oliy taʼlim jarayoniga tashqi aralashuvlarni cheklash, oliy taʼlim sifati va dunyoda raqobatbardoshligini oshirishga xizmat qiladi.

Shuningdek tadbirda maʼruzachilar yoshlarning maʼnan, jismonan va ijodiy tomondan komil inson sifatida yetishishida nafaqat oiladagi muhit yaxshi boʻlishi, balki davlat tomonidan zarur shart-sharoit, imkoniyat ham yaratib berilishi zarurligi, bolaning huquqlari, erkinliklari va qonuniy manfaatlarini taʼminlash hamda himoya qilish, uning jismoniy, aqliy va madaniy jihatdan toʻlaqonli rivojlanishi uchun eng yaxshi shart-sharoitlarni yaratish davlatning burchi, sifatida Konstitutsiyada muhrlanayotgani, davlat va jamiyat bolalarda hamda yoshlarda milliy va umuminsoniy qadriyatlarga sodiqlik, mamlakatidan hamda xalqning boy madaniy va maʼnaviy merosidan faxrlanish, vatanparvarlik va Vatanga boʻlgan mehr-muhabbat tuygʻularini shakllantirish toʻgʻrisida gʻamxoʻrlik qilayotganligi haqida keng tushuncha berdilar.

Targʻibot tadbiri yoshlarni qiziqtirgan savol javoblarga boy boʻldi. Tadbir nihoyasida faollar barchani referendumga faol ishtirok etishga chaqirdi.

Akmal Xaitov,

“Adolat” SDP Qarshi shahar Kengashi raisi.