Yangilanayotgan Konstitutsiyamizda davlatning ijtimoiy majburiyatlariga oid normalar qariyb uch baravarga ortmoqda

O‘qituvchilar, tibbiyot xodimlari, mahalla faollari, tuman tashkilot rahbarlari ishtirok etgan tadbirda Oliy Majlis Qonunchilik palatasi deputati Oltinoy Mamirova yangilanayotgan Konstitutsiya haqida batafsil ma’lumotlar berdi.

Ta’kidlanganidek, yangilanayotgan Bosh qomusimiz mamlakatimizda ijtimoiy, demokratik-huquqiy, chinakam xalqparvar davlatchilik sari tashlanayotgan dadil qadamlar uchun mustahkam asos bo‘ladi. Chunki unda aholi farovonligini oshirish, inson huquq va manfaatlari, qadr-qimmatini yanada yuksaltirish va hayotning barcha sohalarini liberallashtirish bo‘yicha puxta va keng miqyosli huquqiy kafolatlar mustahkamlanmoqda.

— Konstitutsiyamizda davlatning ijtimoiy majburiyatlariga oid normalar qariyb uch baravarga ortmoqda, — deydi deputat O.Mamirova. — Xususan, har kimning uy-joyli bo‘lish huquqi belgilanmoqda. Ushbu normaning amal qilishi har bir fuqaro, jumladan, yosh oilalarning o‘z boshpanasiga ega bo‘lishini ta’minlab, kishilarning hayotdan rozilik darajasini oshirishga xizmat qiladi.

Shuningdek, nogironligi bo‘lgan shaxslarni davlat tomonidan qo‘llab-quvvatlashni nazarda tutuvchi qoidalar yanada takomillashtirilmoqda. Ya’ni, davlat nogironligi bo‘lgan shaxslarning ijtimoiy, iqtisodiy hamda madaniy sohalar obyektlari va xizmatlaridan to‘laqonli foydalanishi uchun shart-sharoit yaratishi, ularning ishga joylashishiga, ta’lim olishiga ko‘maklashishi, zarur axborotni to‘sqinliksiz olish imkoniyatini ta’minlashi belgilanmoqda.

Bundan tashqari, ijtimoiy davlatga xos yondashuv ta’lim sohasi bo‘yicha ham ko‘pgina modda va normalarda o‘z ifodasini topmoqda. Ta’lim va ilm-fanga oid normalar qariyb 2 barobarga oshmoqda.

Uchrashuvda ishtirokchilar yangilanayotgan Konstitutsiya bo‘yicha bergan barcha savollariga atroflicha javoblar olishdi.