Yangilanayotgan Konstitutsiyamizda xususiy mulk daxlsizligi kafolatlanadi

Oxirgi yillarda xalqimiz orasida “snos” degan muammo paydo boʻlgani — haqiqat. Qancha-qancha odamlarimiz uy-joyi yoki boshqa koʻchmas mulkining noqonuniy buzilishi, kompensatsiya toʻlab berilmasligi oqibatida huquqlari buzildi, sud ishlari soniyam, keltirilgan zarar miqdori koʻpayib bordi. Albatta, davlat va jamiyat oʻrtasidagi ijtimoiy-mulkiy nizolar noxush narsa, ammo, oqibatlarning byudjetga taʼsiri nuqtai nazaridan kelib chiqilsa, masala yanada jiddiyligi oydinlashadi. Tahlillar joylarda davlat va jamoat ehtiyojlari uchun er uchastkalarining olinishi bilan bogʻliq aksariyat holatlarda shaxslarning mulk huquqi buzilganini koʻrsatadi. Bunga asosiy sabab qonunchilikdagi boʻshliqlar ekani sir emas. Yangilanayotgan Konstitutsiyamizda yuqoridagi salbiy holatlarni oldini olish maqsadida mulkdorlarga uy-joyning hamda u koʻrgan zararlarning oʻrni oldindan hamda teng qiymatda qoplanishi lozimligi koʻzda tutilgan

Yangilanayotgan Konstitutsiyamizning 47-moddasida Hech kim sudning qarorisiz va qonunga nomuvofiq holda uy-joyidan mahrum etilishi mumkin emas. Uy-joyidan mahrum etilgan mulkdorga uy-joyning hamda u koʻrgan zararlarning oʻrni qonunda nazarda tutilgan hollarda va tartibda oldindan hamda teng qiymatda qoplanishi taʼminlanadi degan modda bilan alohida qayd qilinganligi endilikda fuqarolarning mulkiga nisbatan xar qanday noqonuniy harakatga yoʻl qoʻyilmasligi kafolati boʻladi desak aslo yanglishmagan boʻlamiz.

Endilikda ushbu qoida kuchga kiritilsa, sud qarorisiz fuqarolarning erkiga zid ravishda, yaʼni roziligisiz uy-joydan mahrum qilishga yoʻl qoʻyilmaydi.

Konstitutsiyaga kiritilayotgan mazkur qoida bir necha yillardan buyon jamiyatimizda oʻtkir muammolardan biriga aylangan “snos” bilan bogʻliq muammoga nisbatan xalqparvar, inson manfaatlarini himoya qiluvchi oqilona yechim ekanligini tasdiqlaydi.

Men ham mazkur siyosiy jarayonga befarq emasman. Referendum oʻtkaziladigan kuni men kelajagimiz, farovon hayotimiz va barqaror tinchligimiz uchun ovoz beraman.

Soxib Usmonov, 

“Adolat” SDP Sirdaryo viloyat Kengashi raisi o’rinbosari,

Oliy Majlis Qonunchilik palatasi huzuridagi"Yoshlar parlamenti" aʼzosi.