Yangilangan madaniyat markazida targʻibot tadbiri boʻlib oʻtdi

Men ayni paytda nafaqadaman. Lekin “Adolat” SDP faxriysi sifatida jamoatchilik ishlarida qatnashib turaman. Ayniqsa, shu kunlarda yangi tahrirdagi Konstitutsiya loyihasini targʻib qilishga hissa qoʻshayotganimdan mamnunman.

Kuni kecha, tumanimizdagi “Uchqoʻrgʻon” mahallasida boʻldik. Partiyadoshlarimiz bilan birga bu yerdagi qaytadan bunyod etilgan madaniyat markazining ochilishi marosimida ishtirok etdik. Deputatlarimiz yangi tahrirdagi Bosh Qomus haqida atroflicha fikr yuritdilar. Soʻzga chiqqan qishloq ahli vakillari ham oʻz mulohazalarini bildirib, yurtimizda roʻy berayotgan oʻzgarishlardan xursand ekanliklarini izhor etdilar. 30-apreldagi referendumda faol qatnashishni maqsad qilganliklari toʻgʻrisida ham gapirdilar.

Tadbirdan soʻng madaniyat markazini koʻzdan kechirdik. Bu yerda aholiga boʻsh vaqtini koʻngilli oʻtkazish uchun qulay sharoitlar yaratildi. Mazkur bino yaqin yillargacha tashlandiq holatda boʻlgan. Endi esa davlat byudjetidan ajratilgan 3,6 milliard soʻmdan ziyod mablagʻ hisobiga butunlay yangi qiyofa kasb etdi. Tomosha zali, toʻgaraklar uchun xonalar, kutubxona har bir kishining havasini keltiradi.

Darvoqe, madaniyat markazida dastlabki toʻgaraklar ish boshladi. Ularning ishtirokchilari orasida qoʻshni mahallalarda yashovchi yoshlar ham bor. Sanʼatsevar yigit-qizlarga 180 million soʻmlik oʻttizdan ortiq musiqa asboblari taqdim etildi.

Murodjon JALILOV,
partiya faoli.