Yashikchiik serdaromad soha

Bugungi kunda xotin-qizlarni bandligini taʼminlash orqali, ularning oilaviy daromadlarini oshirish, turmush sharoitlarini yaxshilash dolzarb vazifalardan biridir. Bu borada Qoʻshtepa tumanining shahar markazidan olisda joylashgan hududlarida ommalashtirsa arzigulik tajribalar bor, — deydi Adolat SDP Qoʻshtepa tumani Kengashi raisi Ilhomjon Qosimjonov. -Oʻqchi mahalla fuqarolar yigʻinida istiqomat qiluvchi 450 nafardan ziyod xotin-qizlar yashikchilik faoliyati bilan shugʻullanmoqdalar.

Mahalla aholisi yashikchilar mahallasi sifatida tanilgan. Qishloqning rivojlanish drayveri hisoblangan yogʻochni qayta ishlash bilan aholi yilning barcha fasllarida shugʻullanadi. Mazkur hududdagi qay bir xonadonga kirmang, yashik mixlayotgan yosh u-qariga koʻzingiz tushadi. Bu ish juda murakkab boʻlmaganligi uchun xotin-qizlar ham bemalol shugʻullanishadi. Eng asosiysi, ushbu mehnat orqasidan har bir oilaning roʻzgʻori butligi, oilasi farovonligi taʼminlanmoqda.

Maʼlumotlarga nazar tashlaydigan boʻlsak, mahalladagi 450 nafardan ziyod xotin-qizlar oʻz uylarida yashik tayyorlash bilan shugʻullanishadi. Demak, bir kunda bitta ayol oʻrtacha 200 tagacha yashik tayyorlasa, 120-150 ming soʻm daromad topadi. Bu ishning yana bir afzal tomoni ayollar oʻz uylarida yoki mahalladoshinikida ishlaydi. Qolaversa, uy ishlariga ham bemalol vaqt ajrata oladi.

Qisqasi, bugun respublikamiz miqyosida ommalashtirilib, hayotga tatbiq etilayotgan “Bir mahalla – bir mahsulot” tamoyili Oʻqchi mahallasida ancha yillar oldin boshlangan. Bu yashiklarga joylangan jannatmakon diyorimizning sarxil mevalari yurtimizdagi bozorlarga va dunyoning turli davlatlari aholisiga etib bormoqda. Oʻzbekistonimizning meva-chevalarining eksport salohiyati oshishida shu soddadil insonlarning ham salmoqli oʻz ulushlari bor. Buni Oʻqchi mahallasi xotin –qizlari xayollariga ham keltirmay, mehnatlaridan zavq topib turmush kechirmoqdalar.

    “Adolat” SDP

Fargʻona viloyat kengashi Matbuot xizmati.