“Yashil makon” aksiyasi davom etmoqda

Bugungi kunda yashil olamni saqlash va koʻpaytirish davlat siyosati darajasiga koʻtarildi. Prezident Shavkat Mirziyoyev tomonidan “Yashil makon” umummilliy loyihasini puxta tayyorgarlik bilan boshlash tashabbusi ilgari surildi.Xalqimizga xos boʻlgan qadriyat va anʼanalarimizdan biri, koʻchat ekib bogʻ yaratishdir. Chunki inson hayoti va salomatligini saqlashda hamda atrof-muhitni muhofaza qilib, ekologik muammolarni bartaraf etishda ekilayotgan daraxtlar muhim oʻrin tutadi. Daraxtlar biz nafas orqali chiqarayotgan zararli karbonat angidrid moddasini nafas olishimiz uchun zarur boʻlgan kislorodga aylantirib beradi. Chang-toʻzonlarni oʻzida yutib, havoni tozalaydi. Issiq kunlarda insonlarga salqinlik beradi. Mevalari esa miriqib isteʼmol qilinadi.

Yurtimiz boʻylab amalga oshirilayotgan bu tashabbusni “Adolat” SDPning Qoraqalpogʻiston Respublikasi Kengashi yakdillik bilan qoʻllab-quvvatlab koʻtarinki ruhda amalga oshirishmoqda.26-oktyabr kuni Nukus tumanining “Ornek” ovul fuqarolar yigʻini hududida joylashgan 12 sonli umum taʼlim maktabi yonidagi koʻkalamzorlashtirish uchun moʻljallangan yerga mevali va manzarali daraxtlar oʻtqazishib, savobli ishga oʻz hissalarini qoʻshishdi.

Nihol ekish ishlarida Qoraqalpogʻiston Respublikasi va Nukus tuman Kengashi xodimlari, partiya faollari va deputatlar ishtirok etdilar. Bu loyiha xalqimizni, atrof muhitni muhofaza qilish va yashil maydonlarni koʻpaytirish va ularni saqlash mevali va manzarali daraxtlar va ona zaminga boʻlgan eʼtiborini oshiradi. Atrof muhitni obodonlashtirish va koʻkalamzorlashtirish yoʻlida qilingan har qanday ish eng avvalo, xalq manfaati yoʻlida qilingan savobli ezgu amaldir. Prezidentimiz tomonidan olgʻa surilgan ushbu tashabbus va shuning orqasida amalga oshirilayotgan ishlarning barchasi yaqin yillar ichida oʻz samarasini koʻrsatishiga, vatanimizda yangidan yangi bogʻlar paydo boʻlishiga va yurtimiz chiroyiga yanada chiroy qoʻshishiga sabab boʻladi.

Tadbir davomida koʻkalamzorlashtirish va partiya faoliyati bilan bogʻlik ishlarda tashabbus koʻrsatayotgan bir qator deputatlar va faollar Kengash tomonidan tayyorlangan tashakkurnomalar bilan taqdirlandi.

Quoʻatbay Xojanov,

“Adolat” SDP Qoraqalpogʻiston Respublikasi Kengashi Matbuot kotibi.