Yosh adolatchimiz “Yoshlar parlamenti” aʼzosi boʻldi

Avval xabar berganimizdek, Oliy Majlis Qonunchilik palatasi huzurida tashkil etilgan “Yoshlar parlamenti” aʼzoligiga saylov rejalashtirilgan edi.

Kuni — kecha “Adolat” sotsial-demokratik partiyasi Siyosiy Kengashi Markaziy apparatida boshqa viloyatlar qatori Xorazm viloyatidan koʻrsatilgan nomzodlar orasidan saralab olingan uch nafar nomzodning, jumladan, Yangiariq tuman “Tagan” mahallasi yoshlar yetakchisi Roʻziboy Sapayev, Urganch davlat universiteti talabasi, xonqalik Toʻxtajon Quryazova , Toshkent tibbiyot akademiyasi Urganch filiali talabasi Usmon Yuldoshevlarning salohiyati ochiqlik, oshkoralik, adolat mezonlari asosida sinovdan oʻtkazildi.

Siyosiy Kengash vakillaridan tarkib topgan ishchi guruh aʼzolarining nomzodlar bilan onlayn dasturi orqali yakkama-yakka boʻlib oʻtgan sinov jarayonida UrDU talabasi Toʻxtajon Quryazova gʻoliblikni qoʻlga kiritdi.

Toʻxtajon Quryazova, “Yoshlar parlamenti” aʼzosi:

­­-Koʻp yillardan buyon partiyaga boʻlgan mehrim, qiziqishim va partiyaning saylovoldi dasturiy maqsadlariga boʻlgan hurmatim orqali siyosiy bilim va koʻnikmalarimni boyitib kelganim, bugungi boʻlib oʻtgan saylovda qoʻl keldi. Ishchi guruh tomonidan berilgan savollarga hech qiynalmay javob berdim. Saylovga tayyorlanish jarayonida siyosiy bilimlarim yanada mustahkamlandi. Partiyam tufayli koʻpgina orzu va niyatlarim amalga oshib kelmoqda. Bugun ham zimmamga yanada ulkan masʼuliyat yuklandi. Kelgusida bor isteʼdod va imkoniyatimni partiyam rivojiga safarbar etib, Yangi Oʻzbekistonimizni barpo etishga munosib hissamni qoʻshaman.

Bir soʻz bilan aytganda, yoshlarga bildirilayotgan bu kabi ishonch va berilayotgan imkoniyatlar, ularning jamiyatda munosib oʻrinlarni egallashi orqali mamlakatimiz taraqqiyotini rivojlantirishda muhim oʻrin tutishi bilan ahamiyatlidir.

Zamira Abdullayeva,

“Adolat” SDP

Xorazm viloyat Kengashi matbuot kotibi.