Yoshlar bilan ishlash barchamizning ustuvor vazifamiz bo‘lmog‘i lozim

Mamlakatimiz taraqqiyoti har tomonlama o‘sib-o‘nib kelayotgan navqiron avlodning ta’lim tarbiyasi, ma’naviyati va madaniyati bilan chambarchas bog‘liq. Aynan shu sababdan so‘nggi yillarda mamlakatimizda yoshlar masalasiga davlat siyosatining ustuvor vazifalaridan biri sifatida alohida e’tibor qaratib kelinmoqda.

Bugungi kunda milliy parlamentimiz yoshlar bilan yaqindan ish olib borish, ularning dardu tashvishlarini o‘rganish va muammolariga qonuniy yechim topish borasida o‘ziga xos maktab yarata oldi, desak yanglishmagan bo‘lamiz.

Xususan, Qonunchilik palatasining Yoshlar masalalari bo‘yicha komissiyasiga yoshlarning huquqiy ongi va savodxonligini oshirish, shu orqali ularni jamiyatda faol qatlamga aylantirish, qonunchilik va qonun ijodkorligi jarayoniga keng jalb qilish, qabul qilinayotgan qonunlarni yoshlar orasida targ‘ib qilishdek muhim vazifa va mas’uliyat yuklatilgan.

Oliy Majlis Qonunchilik palatasining yaqinda bo‘lib o‘tgan majlisida Yoshlar masalalari bo‘yicha komissiyaning 2023 yil birinchi yarim yillikdagi faoliyatiga oid axboroti ko‘rib chiqildi.

Avvalo qayd etish kerak, Komissiya tomonidan Qonunchilik palatasida ko‘rib chiqilgan yoshlarning huquqlari, erkinliklari va manfaatlarini yanada mustahkamlashga qaratilgan 14 ta qonun loyihasi yuzasidan 40 dan ziyod asoslantirilgan takliflar tayyorlangan.

Hisobot davrida Komissiya a’zolari qabul qilingan qonunlarning mazmun-mohiyati hamda konstitutsiyaviy islohotlar targ‘ibotiga bag‘ishlangan 200 dan ziyod tadbir, forumlar, o‘quv-seminar va konferensiyalarda faol ishtirok etishgan. Shuningdek, Komissiya a’zolari Oliy Majlis Qonunchilik palatasi huzuridagi Yoshlar parlamentiga saylov o‘tkazish bo‘yicha siyosiy partiyalarning Respublika saylov hay’ati a’zolari bo‘lgan.

Kezi kelganda aytish kerak, Komissiya faoliyatiga oid axborot deputatlar tomonidan tanqidiy-tahliliy ko‘rib chiqilib, Komissiyaga parlament nazoratining ta’sirchan shakllaridan unumli foydalanish bo‘yicha taklif va tavsiyalar berildi.

Xususan, siyosiy partiyalar fraksiyalari va qo‘mitalar a’zolari tomonidan yoshlar o‘rtasida giyohvandlik va psixotrop moddalar bilan bog‘liq holatlarning oldini olish, bola huquqlarini himoya qilish va kafolatlashning huquqiy asoslarini yanada kuchaytirish bo‘yicha bildirilgan takliflar Komissiyaning kelgusi faoliyatida muhim ahamiyat kasb etadi.

Bundan tashqari, deputatlarning taklif-tavsiyalaridan to‘g‘ri xulosa chiqargan holda, Yoshlar parlamenti a’zolari bilan hamkorlikda oilalarda sog‘lom turmush tarzi, ma’naviy-axloqiy tarbiya, iqtisodiy, huquqiy bilimlar, tibbiy madaniyatni oshirish hamda xorijiy mamlakatlarda tahsil olayotgan yoki mehnat qilayotgan yoshlarimizning huquqlarini himoya qilishga qaratilgan me’yoriy-huquqiy hujjatlarning ijrosini nazorat-tahlil tartibida o‘rganish ustuvor vazifa sifatida qaraladi.

Xulosa qilib aytganda, yoshlar tarbiyasi va ongiga tahdidlar tobora kuchayib borayotgan bugungi globallashuv davrida yoshlarning qiziqishlariga befarq bo‘lmasdan, ularni o‘ylantirayotgan muammolarga to‘g‘ri va maqbul yechimlarni izlab topish biz, parlament a’zolarining ustuvor vazifasi hisoblanishi kerak. Zero, bugungi yoshlar ertangi kelajakning egalari ekanligini unutishga haqqimiz yo‘q.

Muhammadjon VALIYEV,

Oliy Majlis Qonunchilik palatasi deputati,

Qonunchilik palatasidagi Yoshlar masalalari

bo‘yicha komissiyasi raisi