Yoshlar — kelajagimiz, ularga eʼtibor hamma vaqt dolzarb

Oliy Majlis Qonunchilik palatasi deputati Mavluda Adhamjonova oʻz saylov hududidagi yoshlarning kelajagiga, ularni har jihatdan barkamol voyaga yetishlari uchun zarur imkoniyatlarni taʼminlashga alohida eʼtibor qaratayotgani bejiz emas.

Xalq vakili 2023-yilning ilk kunlarida Andijon tumanidagi Rovvot, Darxon va Gumbaz MFYlardagi Yoshlar yetakchilari oldiga mahalla yoshlarining bandligi talab darajasidami, deya savol qoʻydi. Bunga javob topish asnosida olib borilgan oʻrganishlarda mazkur MFYlardagi ayrim yigit-qizlarning vaqtincha ishsizligi aniqlandi. Xoʻsh, ularning ertangi kuni qanday boʻladi? Bandligini taʼminlash kimning zimmasida?

“Adolat” SDPning “Vatan kelajagi yoshlar qoʻlida” loyihasi ayni shu maqsadga qaratilgan. Deputat loyiha doirasida amalga oshirilayotgan ishlarga toʻxtaldi, MFY faollari va Yoshlar yetakchilari bu borada masʼuliyatni oshirishi zarurligini taʼkidladi. Hududdagi xususiy sektordagi mavjud boʻsh ish oʻrinlarini aniqlash, yoshlarning qiziqishi va layoqatiga qarab ishga joylashtirish yuzasidan oʻz takliflarini bildirdi. Oʻz oʻrnida Davlatimiz rahbari tomonidan Yoshlar siyosati borasida amalga oshirilayotgan ishlarga ularning eʼtiborini qaratdi.

Mavluda Adhamjonova, Oliy Majlis Qonunchilik palatasi deputati:

- Keyingi vaqtda davlatimiz tomonidan bu masalaga dolzarb vazifa sifatida qaralmoqda. Shunga qaramay MFYlarda vaqtincha ishsizlar yoʻq emas. Ularning bandligini taʼminlash barobarida faolligini oshirish zarur. Ayni shu maqsadda bugun masʼullarni faollikka chaqirdik. Xususiy sektorda 70 ortiq boʻsh ish oʻrni aniqlanib, ularga mahalla yoshlari ishga taklif qilindi.

Quvonarlisi, deputat tashabbusi qanot yozdi. Tumandagi qoʻshni MFYlarning hokim yordamchilari ham oʻz hududida yashovchi yigit-qizlarning bandligini taʼminlashda masʼuliyatni oshirdilar.

Zumradoy Soliyeva,

Oliy Majlis Qonunchilik palatasi deputati yordamchisi.