“Yoshlar qanoti”: Iqtidorlilar safimizga qoʻshilmoqda

Keyingi yillarda Respublikamizda yoshlarga boʻlgan eʼtibor yanada ortdi. Shundan kelib chiqib, ayni davrda “Adolat” SDP Andijon viloyati kengashida yoshlarni qoʻllab-quvvatlash, jumladan iqtidorli yigit-qizlar bilan ishlash asosiy vazifalardan biriga aylangan. Buning natijasida 12 ming 377 nafar “Yosh adolatchilar”ni birlashtirgan “Yoshlar qanoti” safida Zulfiya nomidagi Davlat mukofoti sohibalari, “Mard oʻgʻlon” nishondorlari va qator tanlovlarning gʻoliblari soni ortib bormoqda.

Amaldagi yil boshidan bu borada yana bir loyiha yoʻlga qoʻyildi. “Iqtidorlilarni safimizga chorlaymiz” loyihasi asosida viloyatdagi tadbirkor va tashabbuskor yoshlar orasiga kirib borilmoqda. Partiyamizning maqsad va vazifalari, kelajak avlod kamolotiga qaratilgan loyihalari tushuntirilmoqda.

Shahrixon tumanida oʻtkazilgan ana shunday mavzulardagi suhbat ishtirokchilarida "Adolat"ga boʻlgan qiziqishning yuqori ekanligiga guvoh bo'lishimiz mumkin. Jarayonda oʻndan ortiq yigit-qiz safimizga qoʻshilish istagini bildirdi. Ulardan biri Abdurahim Abaraliyev.

Abdurahim yakka tartibdagi tadbirkor. Oʻz faoliyatini amalga oshirish barobarida ikki nafar tengdoshining ham bandligini taʼminladi. Joriy yilda yangi loyihalar ustida ishlab, faoliyatini yanada kengaytirish harakatida.

Abdurahim Abaraliyev, yakka tartibdagi tadbirkor:

- "Adolat"chilarning innovatsiya borasidagi tashabbuslari meni qiziqtirdi. Tadbirkorlik ham yangilikni, izlanishni talab qiladi. Shu bois, partiya safiga qoʻshildim. Endi oʻz faoliyatimni “Adolat” SDP safida turib davom ettiraman.

Iqtidor sohiblarini izlash va qoʻllab-quvvatlash davom etmoqda.

“Adolat” SDP Andijon viloyat kengashi

Matbuot xizmati.