Yuksak natija barchamizni quvontirdi

Mamlakatimizda sogʻlom turmush tarzini shakllantirish, aholining, ayniqsa yosh avlodning jismoniy tarbiya va ommaviy sport bilan muntazam shugʻullanishi uchun zamon talablariga mos shart-sharoitlar yaratish, sport musobaqalari orqali yoshlarda oʻz irodasi, kuchi va imkoniyatlariga boʻlgan ishonchni mustahkamlash, mardlik va vatanparvarlik, ona Vatanga sadoqat tuygʻularini kamol toptirish, shuningdek, yoshlar orasidan iqtidorli sportchilarni saralab olish ishlarini tizimli tashkillashtirish hamda jismoniy tarbiya va ommaviy sportni yanada rivojlantirishga yoʻnaltirilgan keng koʻlamli ishlar amalga oshirilmoqda.

Olib borilayotgan ishlar natijasida Oʻzbekiston sporti koʻplab jahon arenalarida yuqori choʻqqilarni qoʻlga kiritmoqda. Xususan, Joriy yilning 23-sentabr – 8-oktabr kunlari oʻtkazilgan Xitoyning Xanchjou shahrida oʻtkazilgan XIX yozgi Osiyo oʻyinlarida sportchilarimiz munosib ishtirok etib, 22 ta oltin, 18 ta kumush, 31 ta bronza medaliga sazovor boʻldi. Umumjamoa hisobida esa faxrli beshinchi oʻrinni egallashdi.

Davlatimiz rahbari Shavkat Mirziyoyev sportchilarimiz uchun yoʻllagan tabrigida taʼkidlaganidek, “Ayniqsa, gʻayrat-shijoatli oʻgʻil-qizlarimiz Xitoy Taypeyi, Bahrayn, Shimoliy Koreya, Gonkong, Eron, Indoneziya, Qozogʻiston, Qatar, Singapur, Malayziya, Vetnam, Kuvayt kabi sport sohasida rivojlangan davlatlarni ortda qoldirib, umumjamoa hisobida Xitoy Xalq Respublikasi, Yaponiya, Janubiy Koreya va Hindistondan keyin faxrli beshinchi oʻrinni egallaganliklari Oʻzbekiston sporti tarixida yana bir yorqin sahifa ochdi, desak, haqiqatni aytgan boʻlamiz.”

Mazkur musobaqada oʻzining bor kuch-imkoniyatlari bilan ishtirok etgan Bahodir Jalolov, Jalgasbay Berdimuratov, Ulugʻbek Rashitov, Hasanboy Doʻsmatov, Abdumalik Xalakov, Diyora Keldiyorova, Taxmina Ikromova, Sevinch Rahimova, Vilana Savadyan, Evelina Atalyans, Sharifa Davronova, Safina Saʼdullaeva, Muzaffar Toʻraboev, Olga Zabelinskaya, Shohmurod Xolmurodov, Nurislom Toʻxtasin oʻgʻli, Umid Esonov, Artyom Shturbabin, Hilola Ortiqboeva, Muhsin Hisomiddinov, Zaynab Dayibekova, Pliego Lara Mariya Paola, Xerrera Lara Luiza Fernanda, Guliston Perdebaeva, Anna Prakaten, Shehroz Hakimov, Dilshodjon Xudoyberdiev, Davirjon Davronov, Alisher Turdiev, Murodjon Yoʻldoshevlarni alohida eʼtirof etishimiz lozimdir.

Sportchilarimiz 2024-yil Parijda boʻlib oʻtadigan 33-olimpiya oʻyinlarida ham mamlakatimiz sharafini munosib ravishda himoya qilishlariga ishonchimiz komil.

Jasur Qarshiev,

“Adolat” SDP Jizzax viloyat Kengashi raisining

tashkiliy-partiyaviy ishlar boʻyicha oʻrinbosari.