Yurt taraqqiyoti yoʻlida birlashaylik!

Mamlakatimiz mustaqilligining 32 yilligini biz pedagoglar koʻtarinki ruh va yangi maqsadlar bilan kutib olmoqdamiz,- deydi faxriy pedagog “Аdolat” SDP Buvayda tuman Kengashi raisi Xayrullo Turgʻunov. — Istiqlol yillarida pedagoglarning vatan kelajagi boʻlmish yosh avlodni yurtga munosib qilib tarbiyalashdek mashaqqatli mehnatlariga yuksak eʼtibor qaratildi. Oylik maoshlari bir necha bor oshirildi. Bu boradagi islohotlar koʻlami yil sayin ortib boryapti.

“Yangi hayot uchun, Yangi Oʻzbekiston uchun!” degan bosh gʻoyani oʻzida mujassam etgan maʼnaviy -maʼrifiy tadbir Buvayda tumanidagi 3-maktab pedagoglari davrasida shukronalik fikrlari bilan kechdi. “Vatan ulugʻ sajdagoh”, “ Mustaqillik bergan baxt”, “ Baxtiyorlar vatani –Oʻzbekiston” mavzusida rasmlar va insholar tanlovining gʻoliblari aniqlanib, fidoiy ustozlarga ehtirom koʻrsatildi.

— Yurtboshimiz rahbarligida hukumatimiz tomonidan biz pedagoglarga qaratilgan har bir eʼtibor bizni yangi maqsadlar sari dadil borishga undaydi. “Har bir kun – bu imkoniyat, har bir kun – bu kelajak uchun poydevor” degan hayotiy shiorni qalbga jo etgan holda mustaqillik bayramiga munosib tuhfalar bilan borish harakatidamiz, -deydi maktab direktori, partiya faoli Raʼnoxon Аsqarova. Bugungi tadbirda esa maktabimizda tahsil olib, Oʻzbekiston chempioni degan sharafli nom egalari Ilhomjon Adhamjonov, Zulfiqor Adhamjonovlarga “Adolat” SDP partiyasining esdalik sovgʻalari topshirildi. Maqsadimiz, vatan tinchiligi va taraqqiyoti yoʻlida xizmat qilishdir.

Maktab jamoasi “Аdolat” SDP bilan hamkorlikda bayram oldidan “Mustaqillik saodatim mening” oilaviy insholar tanlovlarini oʻtkazish harakatida. Bundan tashqari, sport, tikuvchilik va kashtachilik kabi bir qator hunarmandchilik yoʻnalishlarida ham tanlovlar oʻtkazilib borilyapti. Shu kuni maktabning 50 nafar pedagoglari “Аdolat” partiyasi saflariga kirish istagini bildirib, partiyaning esdalik sovgʻalari bilan taqdirlandilar.

“Adolat” SDP

 Fargʻona viloyat Kengashi Matbuot xizmati.