Zulfiyaxonimning yuksak insoniy fazilatlari - yoshlarimiz uchun ibrat

Bahor fasli kirib kelishini Zulfiya Isroilova hayoti va ijodi bilan bogʻlaydilar. Bunga sabab shoiraning Bahorning birinchi kunida dunyoga kelishidir. Shu bilan birga shoira oʻzining ijod yoʻli davomida insonlarga bahoriy kayfiyat ulashuvchi sheʼrlar bitganligi ham bu fikrning yaqqol dalili desak adashmagan boʻlamiz.

Bugun Samarqand ixtisoslashtirilgan sanʼat maktab internatida 1-mart — Oʻzbekiston xalq shoirasi taniqli jamoat va davlat arbobi Zulfiyaxonim tavalludiga bu yil 108 yil toʻlishi munosabati bilan “Zulfiyaxonim — tong kuychisi” mavzusida maʼnaviy maʼrifiy tadbir tashkil etildi.

Tadbirga partiya faollari, deputatlari, hamkor tashkilot vakillari hamda mazkur maktabning oʻqituvchi va oʻquvchilari ishtirok etishdi. Tadbirni kirish soʻzi bilan, xalq deputatlari Pastdargʻom tuman Kengashi deputati Gulfiniso Qoʻchqorova ochib berar ekan Zulfiyaxonimning maʼnaviy-maʼrifiy maktabi, hayot yoʻli haqida maʼlumot berib oʻtdi. Shundan soʻng soʻz olgan partiya faoli, “Pastdargʻom haqiqati” gazetasining jurnalisti, ijodkor Guljahon Mardon qizi soʻz olib Zulfiya sheʼriyati, sof, betakror tuygʻular, qalb harorati bilan bitilgan ehtirosli hayotbaxsh sheʼrlar ekanligini eʼtirof etib oʻtdi.

Darhaqiqat, shoiraning ijodi bilan tanishar ekansiz Vatan, insonlar, mehr muhabbat, quvonchu-shodlik, baxt-saodatni tarannum etishga bagʻishlangan ijodi oʻquvchida oʻzgacha kayfiyat paydo etadi. Nafaqat oʻz sheʼrlari, balki butun hayoti bilan oʻzbek yoʻlining maʼnaviy qiyofasini namoyon etgan atoqli shoiramiz Zulfiyaxonim kelajak avlod uchun ibratli maktabni yaratdi. Uning jahon minbarlaridan yangragan sheʼrlari, Sharq ayolining aql-u zakovati, fazl-u kamolining yorqin ifodasi sifatida millionlab sheʼriyat muxlislariga odamiylik, muhabbat va sadoqatdan saboq bergan desak, mubolagʻa boʻlmaydi.

“Zulfiyaxonim — tong kuychisi” deb nomlangan ushbu tadbir barchani xushnud etdi. Jarayon doirasida Zulfiyaxonim ijodiga mansub boʻlgan sheʼrlar, milliy raqslar, dilni rom etuvchi qoʻshiqlar hamda shoiraning hayoti va ijodi bilan bogʻliq ajoyib sahna koʻrinishlari maktabning iqtidorli yoshlari tomonidan mohirona ijro etildi.

Oʻquvchilarning sahna koʻrinishlarini jonli tarzda namoyon eta olganligi, qoʻngʻiroqdek jarangli ovoz bilan shoira sheʼrlarining ijro etilishi, kuylangan qoʻshiqlarning ohangdorligi yigʻilgan mehmonlarda katta taassurot qoldirdi.

Tadbir soʻngida faollik koʻrsatgan oʻquvchilar maktab maʼmuriyati hamda partiya tomonidan munosib taqdirlanib, esdalik sovgʻalar tuhfa etildi.

Xonbuvi Hayitova,
Oʻzbekiston “Adolat” SDP Pastdargʻom tuman
Kengashi raisi