Bu mening mahallam

Prezident yurgan yo‘llarda

Ha, bugun Andijon tumanidagi Saddatagi mahallasida yashovchilar faxr bilan shunday deydi. Adirliklar bag‘rida qad rostlayotgan Yangi Andijon shaharchasiga kirishdagi bu mahalla tarixida bugungidek o‘zgarish bo‘lmagan. Hammasi zamonaviy, chiroyli, havas qilsa arzirli.

Uzoqqa bormaylik, oxirgi ikki yilda hududning qiyofasi tubdan o‘zgardi. Aholini  yo‘llarning taʼmirtalabligi, ichimlik suv tarmog‘idagi uzilishlar, elektr energiyasi bilan bog‘liq muammolar yillar davomida qiynab kelayotgandi. Endi butunlay boshqacha.

Davlatimiz rahbari shu yilning 1 fevralʼ kuni Andijonga tashrifi chog‘ida ayni shu mahalla hayoti  bilan yaqindan tanishdi. 3 ming 600 nafardan ortiq aholi yashaydigan  oilalar yerdan unumli foydalanishning hadisini olgan. Qaysi bir xonadonga kirmang bir qarich yer bo‘sh turganini ko‘rmaysiz. Hatto qish kunlarida ham issiqxonalarda ish qizg‘in. Yilning to‘rt faslida ular yetishtirgan sabzavot mahsulotlari ichki bozorni to‘ldirmoqda. Parrandachilik va uzumchilikda  katta maktab yaratilgan.

-Imkoniyatlardan foydalangan holda oilaviy tadbirkorlik bilan shug‘ullanamiz,-deydi “Adolat” SDP Aʼzosi Bahromjon Qurbonov.- 1 sotix joydagi issiqxonadan yil davomida uch bor hosil olamiz. Hozirda 2500 tup gul ko‘chati parvarish qilinyapti. Shuning o‘zidan 150 million so‘m daromad kutyapmiz. Yana asalari boqamiz, kichik baliqxonamiz mavjud. 30 ta tovuq tuxumga bo‘lgan ehtiyojimizni qondiryapti.  Farzandlarim bo‘sh vaqtini bekor o‘tkazmaydi. Tomorqadan topganlarimiz yaxshi maqsadlarga sarflanmoqda.  

Shu mahallada yashovchi Diyorbek Mamadaliyev xonadonida besh oila yashaydi. Uy muammosi ularni qiynardi. Tajriba tariqasida qurilgan kamxarj, issiq-sovuq va yong‘inga chidamli yig‘ma uy muammoga yechim bo‘ldi. Yangi loyihadagi uy barcha qulayliklarga ega. Asosiysi, ortiqcha joy ham talab qilinmagan.   Butun oila xursand.

        Mazkur xonadonda bo‘lgan Davlatimiz rahbari yangi uy bilan ularni tabrikladi.

      – Uy insonning eng asosiy ehtiyojlaridan biri. Ham davlat, ham tadbirkorlar tomonidan ko‘plab turar joylar qurilayotgani xalqimiz manfaatini taʼminlayapti. Tanlov imkoniyatini kengaytirish uchun, ehtiyojmandlar uchun bunday arzon uylar ham kerak, – dedi Shavkat Mirziyoyev.

Xonadondagi yangilanish butun mahallaga ko‘chgan. O‘tgan yili mahalla binosi yangidan qurildi. ko‘chalar taʼmirlandi, ishkomlar barpo etildi. Aholi bandligini taʼminlashda ham ichki imkoiyatlardan foydalanilmoqda. Aniqrog‘i, oilaviy tadbirkorlik rivojlanyapti. Ayni vaqtda 220 xonadonda turli yo‘nalishlarda tadbirkorlik yo‘lga qo‘yilgan.

-19 km. ichki yo‘lga beton qoplandi, Elektr energiya taʼminotini yaxshilash maqsadida 336 ta beton tayanch ustun o‘rnatildi,  3 ta transformator o‘rnatildi. 13.5 km. toza ichimlik suvi va 10.5 km. tabiiy gaz tarmoqlari taʼmirlandi. 17  ming  tupdan ortiq mevali va manzarali ko‘chatlar o‘tqazildi. Yuqoridagilarga javoban xalqimizning yaratuvchilik tashabbusi o‘sib boryapti. — deydi  MFY raisi Sarvinoz Qodirova .

Keyingi yillarda respublikamizda aholi o‘sishi hisobiga elektr isteʼmoli ham kundan-kunga oshmoqda. Saddatagida bu muammoning yechimi sifatida qayta tiklanuvchi elektr energiya manbalaridan foydalanishga o‘tilyapti. Quyosh energiyasidan foydalanayotgan 50 ta xonadonda ortiqcha xarajatning oldi olindi. Ahamiyatlisi, siz uyingizga quyosh paneli o‘rnatsangiz, ehtiyojingizdan ortib qolgan elektrni davlatga sotishingiz mumkin. Shu sabab Prezidentimiz Andijon tajribasi sifatida buni ommalashtirish taklifini bildirdi.

Ehtiyojmand oilalarni qo‘llab-quvvatlash, ularning uy-joy sharoitlarini yaxshilash, bandligini taʼminlash borasida olib borilayotgan ishlardan ham fuqarolar mamnun.  Yakka yolg‘iz yashovchilar va keksalar alohida eʼtiborda. 

O‘rmonjon Yo‘ldoshev salomatligi sabab  ro‘zg‘ordan orttirib uy-joyni taʼmirlashga imkon topa olmayotgandi. Homiylar ko‘magida u ikki xonali yangi uyli bo‘ldi. Shu kabi 100 ta ehtiyojmand oilaning uy-joylari taʼmirdan chiqarildi.

— Kun sayin obod bo‘layotgan uy-joylar, ko‘chalarni, hayotimizdagi o‘zgarishlarni ko‘rib, faqat shukr keltiryapmiz,-deydi faxriy otaxon Tohirjon So‘pimatov.-Juda qisqa vaqtda bu qadar o‘zgarish bo‘lishini tasavvur ham qilmagandik. Nabiralarimiz uchun bog‘chaga borish bir orzu edi. Hozir hududimizda 3 ta nodavlat maktabgacha taʼlim muassasasi bor. O‘quvchi-yoshlarimizning ham quvonchi cheksiz. Maktabimiz taʼmirlangach barcha qulayliklar yaratildi. Hatto shu joyning o‘zida kasb-hunar o‘rganish imkoniyati mavjud. Bunday imkoniyat sira bo‘lmagan.

Bir so‘z bilan aytganda Yurtboshimizning Andijon viloyatiga tashrifi saddatagiliklarning kayfiyatini ko‘tardi, ertangi kunga bo‘lgan ishonchini yana-da mustahkamladi.

Akbarjon Nazarov

“Adolat” SDP faoli