Shifokorlarni huquqiy maqomini oshirish vaqti keldi

Kuni kecha ijtimoiy tarmoqlarda «Surxondaryo viloyati Boysun tumanida vrach ayovsiz kaltaklandi»! sarlavhasi ostida videolavha tarqalgan edi.

Mazkur holatni o‘rganish maqsadida O‘zbekiston “Adolat” SDP Boysun tuman Kengashi vakillari va deputatlari Boysun tuman birlashmasiga tashrif buyurishdi.

Aniqlanishicha, shifokor F.J. va qo‘l ostida ishlaydigan xodimasi F.X. o‘rtasidagi nizoga, F.X.ning yaqin qarindoshlari aralashishi natijasida o‘zaro janjal kelib chiqadi. Ushbu holat oqibatida shifokor F.J.ning tan jarohat olganligini ko‘rishimiz mumkin.

Ayni paytda mazkur holat yuzasidan tergovga qadar tekshiruv harakatlari olib borilayotganligi maʼlum bo‘ldi.

Mazkur holatni kuzatar ekansiz, afsuski, keyingi paytlarda xalqimizning asriy qadriyatlariga va anʼanalariga zid bo‘lgan bunday nomaqbul holatlar ko‘payib borayotganligini ko‘rishimiz mumkin. Ayniqsa, shoshilinch va tez tibbiy yordam ko‘rsatish tizimida bu kabi holatlar kunda-kunora uchrab turibdi.

O‘tgan yil Tibbiyot xodimlari bilan bo‘lgan muloqotda davlat rahbari tibbiyot xodimlari faoliyatiga aralashuv, ular duch keladigan zo‘ravonlik va shu kabi xunuk hodisalarga to‘xtalib o‘tgan edi.

«Shifokorga qo‘l ko‘tarish, uni so‘kib, haqorat qilish bizning insof-diyonatli, oq ko‘ngil, mehr-oqibatli xalqimizga munosibmi? Bu bizga mutlaqo yarashmaydigan holatdir»,- degan edi Prezidentimiz..

Endi, tibbiyot xodimlari faoliyatiga qonunga xilof ravishda aralashgan, ularning ishiga to‘sqinlik qilgan hamda tajovuz ko‘rsatgan kimsalarga nisbatan qonunchilikda alohida maʼmuriy va jinoiy javobgarlik belgilanishi aytib o‘tilgan edi.

Yuqoridagilardan kelib chiqib, quyidagi fikrga borasiz: mayli nomaqbul ishlar uchun bezorilarga jinoiy yoki maʼmuriy javobgarlik berilar, ammo, o‘z zimmasiga inson salomatligini asrashdek og‘ir vazifani olgan oq xalatli fidoiylarning qadri-qimmati, toptalgan izzatini nima bilan to‘ldirish mumkin!?

Lekin nima bo‘lganda ham Gippokrat qasamiga sodiqlik bilan ish olib borayotgan soha xodimlariga nisbatan har doim mehrli va hurmatli munosabatda bo‘lishimiz zarur.

Bugun bu kabi shifokor va fuqarolar o‘rtasidagi haq-huquqlar buzilishi oqibatida yuzaga kelayotgan nizolar har ikki tomon o‘rtasidagi munosabatlarni qonun bilan mustahkamlash zarur ekanligini ko‘rsatib bermoqda.

Maʼlumki, “Adolat” SDP o‘zining saylovoldi dasturida aholiga kafolatli va sifatli tibbiy xizmat ko‘rsatish sohasiga ham alohida ahamiyat berilgan bo‘lib, tibbiyot xodimlari mehnatini rag‘batlantirish, zamonaviy texnologiya va davolash usullarini keng joriy etish, dori vositalarining noqonuniy aylanishiga to‘liq chek qo‘yib, qalbakilashtirilgan, sifatsiz dori vositalari sotilishining oldini olish bilan bir qatorda «Tibbiyot xodimi» maqomini mustahkamlash, ularning ijtimoiy muhofazasini taʼminlash va ularga bo‘lgan turli tazyiqlarning oldini olishga xizmat qiladigan huquqiy bazani yaratish va bu orqali ikki tomon huquqlari va majburiyatlarini tartibga solish tashabbusini ilgari surib, bu masalani bir necha yillardan buyon ko‘tarib chiqmoqda.

Partiya o‘z elektoratining asosiy qismini tashkil etuvchi sog‘liqni saqlash xodimlarining xalq va qonun oldidagi mavjud burch va majburiyatlarini alohida eʼtirof etgan xolda, huquq va erkinliklari ham har tomonlama to‘laqonli himoya etilishi kerak, deb hisoblaydi. Zotan, «qonun – ustuvor, jazo – muqarrar» bo‘lgan jamiyatdagina rivojlanish, tinchlik-osudalik va barqarorlik bo‘ladi. Muxtasar qilib aytganda, partiyamiz tomonidan mavjud muammoga yechim sifatida ilgari surilayotgan g‘oyalar soha xodimlarining sifatli faoliyat olib borishini taʼminlash bilan bir qatorda, inson manfaatlarini, uning qadr-qimmatini yuksaltirishga xizmat qiladi.

“Adolat” SDP maʼsul tashkilotlardan jamiyatda  inson huquqlari, erkinliklari va qonuniy manfaatlarini himoya qilishni, ijtimoiy adolat va qonun ustuvorligini taʼminlashni, samosud qilivchi bezorilarga sud orqali qonuniy chora ko‘rishni hamda fuqarolarning huquq va erkinliklarini himoya qilish tizimini yana-da kuchaytirish lozim deb hisoblaydi.

Shifokorlarga nisbatan qilinayotgan tazyiq va zo‘ravonlikka qarshimiz!

“Adolat” SDP

Matbuot xizmati