Sifatsiz va qalbakilashtirilgan dori vositalariga qarshimiz!

Shu kunlarda “Dok-1 Maks” tabletka va sirop dori vositalarini qabul qilgandan soʻng bemorlarda turli nojoʻya taʼsirlar kuzatilgani va hatto buning natijasida bolalar oʻlimi qayd etilgani borasidagi xabarlar azal-azaldan bolajon, insonparvar xalqimizning qalbida chuqur qaygʻu uygʻotdi.

Qayd etilishicha, Samarqand viloyati bolalar koʻp tarmoqli tibbiyot markazida sentyabr–dekabr oylarida Jizzax, Qashqadaryo, Navoiy hamda Samarqand viloyatidan boʻlgan 21 nafar bemor oʻtkir buyrak zararlanishi bilan tekshirilib, davolangan. Natijada 3 nafar bemor sogʻlomlashtirilib uyiga javob berilgan, ammo ularning 18 nafari vafot etgan. Ayanchlisi, ularning barchasi 6 yoshgacha boʻlgan bolalar, shulardan 15 nafari esa 3 yoshgacha boʻlgan norasidalardir.

Sogʻliqni saqlash vazirligining holat yuzasidan oʻrganishlari natijasida bemor bolalarga mazkur preparat shifokorlar retseptisiz berilgani aniqlangan. Buning oqibatlariga esa, afsuski, bugun barchamiz guvoh boʻlib turibmiz.

Tabiiyki, ushbu noxush holat barcha yurtdoshlarimiz qatorida biz adolatchilarning ham qalblarimizni larzaga keltirdi. Sababi partiyamizning saylovoldi dasturida ushbu masalaga oid, ayni davr uchun muhim boʻlgan bir qator dasturiy gʻoyalarni oʻz oldimizga belgilab olganmiz. Bu borada partiyamiz faollari mamlakatimizda 2019-yil boʻlib oʻtgan parlament saylovlari jarayonida va shundan keyingi faoliyatimiz davomida ham bir necha bor “Sifatsiz va qalbakilashtirilgan dori vositalariga qarshimiz!” shiori ostida dori vositalarining noqonuniy aylanishi, qalbakilashtirilgan va sifatsiz dori vositalari sotilishining oldini olishga doir bir qator tashabbuslarni koʻtarib chiqib, hukumat va jamoatchilikni ushbu masalalarga jiddiy eʼtibor qaratishga chaqirib kelmoqdamiz.

Shuningdek, bizning partiya bir necha yillardan buyon tibbiy faoliyat ustidan davlat-sanitariya nazoratini kuchaytirish, dorilarni vrach retsepti asosida berilishini yoʻlga qoʻyish hamda dori vositalari reklamasini cheklashga qaratilgan qonunlarni qabul qilishga doir tashabbuslar bilan chiqib, aholini yuqori samarali xavfsiz dori-darmon va tibbiy vositalar bilan arzon narxlarda taʼminlash, qalbakilashtirilgan va sifatsiz dori-darmonlarning noqonuniy aylanmasiga chek qoʻyish, nafaqat hayotiy zarur medikamentlar aylanmasi va sifati, balki chakana savdoga tushuvchi barcha dorilar ustidan qatʼiy davlat va jamoatchilik nazoratini oʻrnatishni taklif etib kelmoqda.

Shu maqsadda biz dorilarning yagona elektron bazasini shakllantirishni va unda barcha dorilarning nomi, narxi, ishlab chiqaruvchisi va savdoga chiqaruvchisi, chet eldan keltirilgan dori-darmonlar uchun esa import qiluvchining maʼlumotlarini koʻrsatadigan elektron tizimni tatbiq qilishni, bu tizim orqali esa dorilarning narxini barqarorlashtirish va sifatini taʼminlashni nazarda tutganmiz.

Biz ayni vaziyatda mutasaddi tashkilotlar va masʼullarni yuz bergan noxush holatdan toʻgʻri xulosa chiqarishga, aholini sifatli tibbiy xizmat va dori-darmon vositalari bilan taʼminlash borasida bildirilayotgan takliflarga jiddiy eʼtibor qaratishga, sifatsiz dori vositalari sotilishining oldi olish, telekanallarda, birinchi oʻrinda voyaga yetmaganlarga moʻljallangan telekanallar va telekoʻrsatuvlarda dori vositalari reklamasini joylashtirishni taqiqlashga doir choralarni kechiktirmasdan amalga oshirishga chaqirib qolamiz. Zero, fuqarolarimizning salomatligi – mamlakatimizning ulkan boyligi, jamiyatimizning barqaror rivojlanishi garovidir.

Shu oʻrinda mazkur noxush holat natijasida dunyodan erta koʻz yumgan 18 nafar bolaning ota-onalari va yaqinlariga Oʻzbekiston “Adolat” SDP nomidan chuqur hamdardlik bildiramiz.

“Adolat” SDP

Matbuot xizmati