Vazirlik nega jim?

Shu oʻtgan 10 kunlikdagi mamlakatimizda hukmronlik qilgan sovuq kunlar hammamizni tentiratib qoʻydi.

Barchamizni xabarimiz bor kuni kecha ijtimoiy tarmoqda Toshkent shahri va viloyatlarimizda umumtaʼlim maktablari onlayn yoki oflayn tarzda ishlashi boʻyicha ota-onalarga maʼlumotlar yetkazildi.

Rasmiy xabarlarga qaraganda joriy yilning 23-yanvar, dushanba kunidan barcha bogʻcha, maktab, professional taʼlim muassasalari, Prezident maktablari, ijod va ixtisoslashtirilgan maktablar, akademik litsey va oliy oʻquv yurtlarida anʼanaviy tarzda darslar boshlanishi rasman eʼlon qilindi.

Lekin, shu joyda bir masalaning eʼtiborga olinmay yoki oxirigacha oʻylanmay, ushbu qarorga kiritilayotganligi notoʻgʻridek?! Bu maktabgacha taʼlim muassasalari bilan bogʻliq masala. Chunki, mantiqan olib qaralganda, MTMlarga 7 yoshgacha boʻlgan bolalar borishadi. Bilamizki, bugungi kunda MTMlarga bolalarni qamrab olish davlat siyosati darajasiga olib chiqilgan. Shunday ekan, odatda ota-onalar oʻz farzandlarini oʻzlari yashaydigan yaqin hududda joylashgan MTMlarga topshirib, bemalol ishga ketishadi. Ammo, bugungi yuzaga kelayotgan noqulay vaziyatda yechilishi lozim boʻlgan ushbu muhim masala yechilmaganligicha qolib ketgandek.

Maʼlumki, barcha tashkilot, idoralarda maktab va bogʻchalarga berilgan taʼtil davlat idoralarining ishchi xodimlari uchun amalda emas, hamma oʻz ishi bilan band, ishlayapti. Tabiiyki, davlat tashkiloti va idoralarida ishlaydigan xodimlar orasida yosh bolali oilalar ham bor, hali bogʻchalarda bolalarga talab darajasida shart-sharoit (isitish tizimi va suv taʼminoti) boʻlmaganligidan ish faoliyatini boshlay olmayotganligi sababli, ular, yaʼni ota-onalar qanday yoʻl tutishni bilmay boshi qotgan. Chunki, bogʻcha yoshidagi bolasiga uyda qaraydigan odami yoʻq, ish xonasiga olib borishning esa iloji yoʻq. Toʻgʻri, sanoqli boʻlsa ham ayrim tashkilot rahbarlari ushbu vaziyatni toʻgʻri va odilona anglagan holda oʻz xodimlarini qoʻllab-quvvatlab, onlayn rejimida ishlash imkoniyatini berdi. Lekin, bu hamma tashkilot shunday ish qildi degani emas.

Shu va shunga oʻxshash vaziyatlarni eʼtiborga olib, Maktabgacha va maktab taʼlimi vazirligi rasman qaror chiqarsa, maqsadga muvofiq boʻlar edi. Bugungi kunda oʻquv jarayonlarini boshlash uchun qaror chiqarish hokimliklarga berildi. Toʻgʻri, bu ham har bir tuman oʻz imkoniyatidan, sharoitidan kelib chiqib, ish qilishi kerak boʻlgan masala. Biroq, masʼul vazirlikning rasmiy munosabatini bilmay turganligi sabab, davlat tashkilotlarida ishlovchi yosh bolali ota-onalar bilan yuqoridagi kabi tushunmovchiliklar kelib chiqmoqda.

Bunday vaziyatlarda Vazirlik MTTlarning ish faoliyatini anʼanaviy tarzda boshlanish yoki boshlanmaslik, agar boshlansa ham (jadval asosida) vaziyatni atroflicha oʻrgangan holda oʻz munosabatini bildirishini koʻp sonli ota-onalar nomidan kutib qolamiz.

Gulniso Saidova,
“Adolat” SDP Siyosiy Kengashi Markaziy apparati
Ayollar va yoshlarning siyosiy faolligini oshirish boshqarmasi boshligʻi