Ayol ish bilan band boʻlsa, oilasi ham farovon boʻladi

Keyingi yillarda respublikamizda xotin-qizlarga boʻlgan eʼtibor yanada ortdi. Davlatmiz rahbari boshchiligida ularga har tomonlama koʻmaklashish, ogʻirini yengillatish, oila va jamiyatda duch kelayotgan muammolarini bartaraf qilish yoʻlida izchil ish olib borilmoqda. Bu ayni vaqtda ayollarning faolligini oshirishga, oiladagi oʻrnini mustahkamlashga xizmat qilyapti.

Yuqoridagilardan kelib chiqib, Andijon viloyatida ijtimoiy qiyin ahvoldagi opa-singillarimizni qoʻllab-quvvatlash dolzarb vazifalardan biriga aylandi. Bugun har bir xotin-qiz jamoatchilik eʼtiborida. Xususan, “Temir daftar”, “Ayollar daftari” va “Yoshlar daftari”ga kiritilganlar qoʻllab-quvvatlanmoqda. Aytish mumkinki partiyamizning “Bir oyda bir ish oʻrni” loyihasi ham ayni shu maqsadga qaratilgan.

Loyiha doirasida biz mahalla faollari bilan hamkorlikda ijtimoiy koʻmakka muhtoj oilalarga kirib borib, ularni moddiy va maʼnaviy qoʻllab-quvvatlash barobarida bandligiga eʼtibor qaratyapmiz.Chunki ayolning ish bilan bandligi oila farovonligini taʼminlaydi. Qolaversa, ertangi kunga boʻlgan ishonchini oshiradi,

Shu oʻrinda oʻtgan 2022-yilda amalga oshirilgan ishlarga nazar tashlasak sezilarli natijalar koʻzga tashlanadi. Partiya faollari va mahalliy kengash deputatlari tomonidan bu borada aniq reja asosida ish olib borildi. Yil davomida partiya aralashuvi bilan 363 nafar ishsiz xotin-qizlarning bandligi taʼminlandi. Ularning aksariyati tayinli bir kasbga ega emas. Birinchi navbatda “ustoz-shogird” yoʻnalishida hunar oʻrgatildi. Shundan soʻng hududlardagi boʻsh ish oʻrinlari oʻrganilib, taklif qilindi. Bunda davlat sektoridan tashqari xususiy sektorning ham roli katta boʻldi.

Qoʻrgʻontepalik Iroda Iskandarovaning oilaviy sharoiti ogʻir, turmushidan ajrashgan. 1-guruh nogiron ukasiga ham qarovchi. Toʻgʻri, MFY va homiylar tomonidan yordam koʻrsatiladi, biroq u oʻz mehnati bilan kun koʻrish harakatida.

Partiya taklifi bilan u tumandagi “Xantex group” qoʻshma korxonasiga tikuvchilikka ishga olindi. Endi kimdandir yordam kutmay yashayotganidan xursand.

Qoʻrgʻontepa tumanida yashovchi Zarifa Nurmuxammedova 2-guruh nogironi. Shunday boʻlsa-da oʻz ish joyiga ega boʻlish, jamiyat rivojiga hissa qoʻshish uning orzusi. Bu borada bizning taklifimizga “Oʻzbekiston pochtasi” tuman boʻlimi “labbay” deya javob berdi. Natijada Z.Nurmuhammedova xabarchi vazifasiga ishga joylashtirildi.

Shu tumanda yashovchi Nargiza Mamadaliyeva ham koʻpdan buyon ishsizlik muammosidan qiynalayotgandi. Partiyaning tuman boʻlimiga qilgan murojaati eʼtiborimizni tortdi. Oʻrganish natijasida u tuman Mudofaa ishlar boʻlimida ishli boʻldi. Endi uning oʻz jamoasi, ish joyi bor. Oilasining iqtisodi ham yaxshilanmoqda.

Paxtaobod tumanida ham xotin-qizlar bandligini taʼminlash “adolatchilar”ning doimiy ishiga aylangan. Safdoshlarimiz bu yoʻlda MFY va tadbirkorlar bilan hamkorlikda ish olib boryapti. Natijada ishli boʻlganlarda partiyamizga ishonch ortmoqda.

Nafisa Sattorovani ishga joylashtirish masalasida “Ovushka” MFY oʻyinchoq ishlab chiqaruvchi xususiy korxona bizni qoʻllab-quvvatladi. Fuqaro Umida Hojimatovani esa tumandagi “Sevinch” xususiy korxonasi oʻz bagʻriga oldi. Endi ular oʻz jamoasida “Adolat” nomi bilan partiyamiz targʻibotini olib bormoqda.

Umuman olganda Andijonda bandlik masalasida “adolat”chilar faol. Bu xotin-qizlarga boʻlgan eʼtiborimizni oʻzida ifodalamoqda.

Madaminjon Madazimov,

“Adolat” SDP Andijon viloyat kengashi raisi.