Barcha turdagi korruptsiya holatlari bartaraf etiladi

Korruptsiya - insonlarning ijtimoiy adolatga, davlat organlariga nisbatan ishonchni susaytiradigan, davlatning iqtisodiy oʼsishiga salbiy taʼsir koʼrsatadigan, shu bilan birgalikda jamiyatdagi maʼnaviy muhitni buzilishiga sabab boʼladigan salbiy illatdir.

Shu bois, soʼnggi yillarda yurtimizda korruptsiyaning oldini olish va unga qarshi kurashish, davlat va jamiyat qurilishining barcha sohalarida korruptsiogen omillarga chek qoʼyishga qaratilgan keng koʼlamli islohotlar izchil amalga oshirilmoqda. Qolaversa, davlat organlari va tashkilotlari zimmasidagi vazifalarni bajarishda yuzaga keladigan korruptsiyaga oid harakatlarni baholash tizimini takomillashtirish va davlat xizmatiga halollik standartlarini joriy etish boʼyicha ishlar olib borilmoqda.

Shu bilan bir qatorda, korruptsiyaga qarshi kurashish samaradorligini tubdan oshirish boʼyicha belgilangan vazifalar korruptsiya holatlarining sabab va shart-sharoitlarini aniqlash, ularni bartaraf etishning taʼsirchan tizimini yaratishni taqozo etmoqda. Ushbu ishlarga barcha davlat tashkilotlari va nodavlat sektorning boshqa vakillarini ham keng jalb etish zarurati tugʼilmoqda.

Shuni inobatga olgan holda, kuni kecha davlatimiz rahbari Shavkat Mirziyoev tomonidan “Korruptsiyaga qarshi murosasiz munosabatda boʼlish muhitini yaratish, davlat va jamiyat boshqaruvida korruptsiyaviy omillarni keskin kamaytirish va bunda jamoatchilik ishtirokini kengaytirish chora-tadbirlari toʼgʼrisida”gi Farmoni hamda “Korruptsiyaga qarshi kurashish faoliyatni samarali tashkil etishga doir qoʼshimcha chora-tadbirlar toʼgʼrisida”ga Qarori imzolandi.

Mamlakatda korruptsiya holatini tizimli tahlil qilishni taʼminlash, shuningdek, korruptsiyaga oid xavf-xatarlar yuqori boʼlgan sohalar hamda korruptsiyaga oid huquqbuzarliklar sodir etilishining sabab va shart-sharoitlarini aniqlash va bartaraf etish maqsadida imzolangan mazkur Farmonda 2021-2022 yillarga moʼljallangan Korruptsiyaga qarshi kurashish boʼyicha Davlat dasturi tasdiqlandi. Qolaversa Farmonga koʼra barcha davlat organlarida korruptsiyaga qarshi ichki nazorat tuzilmalari faoliyati yoʼlga qoʼyilishi, “Manfaatlar toʼqnashuvini tartibga solish toʼgʼrisida”gi Qonun ishlab chiqilishi, “Korruptsiyaga oid jinoyatlarni sodir etishda aybdor deb topilgan shaxslarning ochiq elektron reestri” yuritilishi, “Korruptsiyaviy xavflarni baholash elektron tizimi” ishga tushirilishi, har yil yakuni boʼyicha barcha davlat organlarida korruptsiyaga qarshi kurashish ishlarining samaradorligini baholovchi reyting eʼlon qilinishi belgilandi.

Yurtboshimiz tomonidan imzolangan mazkur Farmon va Qaror barcha davlat organlari hamda tashkilotlari rahbarlari va xodimlariga ulkan masʼuliyat yuklaydi. Shu bilan birgalikda ularning zimmasiga yuklatilgan xizmat va vazifalarni sidqidildan bajarishga, ijro intizomini musahkamlash, korruptsiya va taʼmagirlikka qarshi kurash borasida aniq maqsadga yoʼnaltirilgan qatʼiy choralar koʼrishga undaydi.

Orif ShUKUROV,

Oʼzbekiston “Аdolat” SDP

Jizzax viloyat Kengashi raisi