Bir bolaga yetti mahalla ota-ona!

Insonlarga nima boʻlyapti? Ular nega bu qadar vahshiylashib ketishmoqda? Aynan mana shunday savollarga bugun biz qayerdan javob topishni bilmay halakmiz. Ayniqsa, chor atrofimizda yuz berayotgan achinarli vaziyatlarga biz shunchaki koʻz yumib ham keta olmaymiz. Payqagan boʻlsangiz gap kuni kecha ijtimoiy tarmoqlarda Yangihayot tumanida 12 yoshli qizning murdasi topilganligi haqidagi xabarlar xususida bormoqda. Sir emaski, bu voqea vatanimizdagi hech bir kishini befarq qoldirmadi.

Hozirgi kunning dolzarb mavzularidan biri boʻlgan zoʻravonlikka qarshi kurashish, zoʻravonlikni oldini olish borasida olib borilayotgan chora tadbirlarning amali yetarli darajada boʻlmayapti chamamda. Sababi bugun kuzatsangiz, sodir etilayotgan koʻplab jinoyatlar asosan yoshlar oʻrtasida uchramoqda. Nega? Nima uchun? Nahotki biz yoshlarimiz tarbiyasiga shunchalik befarq boʻlayotgan boʻlsak? Darhaqiqat mana shu dahshatli voqeaning ham aynan voyaga yetmagan qizaloq bilan sodir boʻlganligi ushbu jinoyatni sodir etgan kimsaning jazosini yanada ogʻirlashtirishi aniq. Shu va shunga oʻxshash voqealarni oldini olishimiz, buning uchun esa har birimiz nafaqat oʻz farzandlarimiz balki, mahallamiz yoshlari bilan ham jiddiyroq shugʻullanishimiz darkor. Zero, ular bunday jirkanch jinoyatlarga qoʻl urmasinlar. 

Ishonamizki, hech bir jinoyat jazosiz qolmaydi. Ammo, shu oʻrinda bu kabi noxush vaziyatlarni OAVlarda yoritilishi qaysidir maʼnoda salbiy oqibatlarni yuzaga keltirishi tabiiy. Chunki aynan shunday mazmundagi xabarlar bugun jamiyatimizdagi insonlarning ong ostiga salbiy taʼsir etib, vahshiyliklarga nisbatan koʻnikuvchanlikni hosil qilib, natijada bunday vaziyatlarni oddiy holday qabul qilinishiga sabab boʻlayotganday. 

Lekin nima boʻlganida ham biz bugun nafaqat oʻz farzandlarimizni balki atrofimizdagi qoʻni- qoʻshnilarimizning ham farzandlaridan xabardor boʻlishimiz zarurdir. Zero aytishadi-ku bir bolaga yetti mahalla ota-ona deb!

Shu oʻrinda, marhum qizaloqning oila aʼzolariga taʼziyamizni bildirib qolamiz!

Hayitova Xonbuvi,
“Adolat”SDP Pastdargʻom kengash tuman raisi.