Fraksiya a’zolari qonun loyihasi yuzasidan o‘z pozitsiyasini bildirdi

Oliy Majlis Qonunchilik palatasidagi “Adolat” SDP fraksiyasi yig‘ilishida “Sudlarda yer uchastkalariga bo‘lgan huquqlar bilan bog‘liq ishlarni ko‘rish tartibi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasi ko‘rib chiqildi.

Ta’kidlanganidek, hozirgi kunda sudlar tomonidan yer uchastkalariga bo‘lgan huquqlar bilan bog‘liq nizolarni hal etishdagi muammolarni o‘rganish natijasiga ko‘ra, mazkur toifadagi ishlarda qurilish maqsadlari uchun ajratilmagan yer uchastkalarida o‘zboshimchalik bilan qurilgan imoratlarga mulk huquqini belgilash, qishloq xo‘jaligiga mo‘ljallangan yerlarni uzoq muddatli ijaraga berish majburiyatini yuklash haqida qarorlar qabul qilingan.

Bunday qarorlar asosida o‘zboshimchalik bilan egallangan yer maydonida qurilgan binolarga noqonuniy egalik huquqi belgilangan yoki egalik huquqini davlat ro‘yxatidan o‘tkazish bo‘yicha kadastr va mahalliy ijroiya hokimiyati organlariga majburiyat yuklangan.

Ushbu toifadagi ishlarni ko‘rish tartibini takomillashtirish maqsadida sudlar tomonidan yer uchastkalariga bo‘lgan huquqlar yuzasidan davlat manfaatlari bilan bog‘liq ishlarning muhokamasida prokurorning majburiy ravishda ishtirok etishini belgilash zaruriyati mavjud.

Taklif etilayotgan qonun loyihasi yuridik va jismoniy shaxslarning yer uchastkalariga bo‘lgan huquqlarini himoya qilishni ta’minlash, bu sohada qonuniylikni mustahkamlash, shuningdek sudlarda yer uchastkalariga bo‘lgan huquqlar bilan bog‘liq ishlarni ko‘rish tartibini takomillashtirish maqsadida ishlab chiqilgan.

Mazkur hujjatda sudlar tomonidan yer uchastkalariga bo‘lgan huquqlar yuzasidan davlat manfaatlari bilan bog‘liq ishlarning muhokamasida prokurorning majburiy ravishda ishtirok etishini belgilash nazarda tutilmoqda.

Fraksiya a’zolari qonun va adolat ustuvor bo‘lgan mamlakatda taraqqiyot, farovonlik, yuksalish bo‘lishi, islohotlar samara berishini aytib, loyihani yanada takomillashtirish bo‘yicha partiya maqsad va vazifalaridan kelib chiqib, bir qator takliflar berdi.

Qonun loyihasi yuzasidan ko‘tarilgan barcha savollarga mutasaddilardan atroflicha javoblar olingach, hujjat loyihasi deputatlar tomonidan ma’qullandi.

Kun tartibidagi masalalar yuzasidan fraksiyaning tegishli qarori qabul qilindi.