Inson qadri ulugʻlangan qomusiy hujjat

Xabaringiz bor, joriy yilning 30 aprel kuni Mamlakatimiz ijtimoiy-siyosiy hayotida muhim voqelik – Oʻzbekiston Respublikasi Oliy Majlisi Qonunchilik palatasining “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy Qonuni loyihasi boʻyicha Oʻzbekiston Respublikasi referendumini oʻtkazish haqida”gi qaroriga asosan referendum oʻtkaziladi.

Unda “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy Qonuni umumxalq ovoziga qoʻyiladi. “Аdolat” SDP Navoiy viloyat Kengashi tomonidan oʻtkazilgan “Konstitutsiyaviy islohotlar-inson qadri uchun” mavzusidagi oʻquv-seminarda shu masala muhokama etildi. Unda partiyaning viloyat Kengashi faollari, shahar va tuman Kengashlarining raislari, BPT yetakchilari, “Yosh adolatchilar” va OАV vakillari ishtirok etdi.

Tadbirda dastlab “Аdolat” SDP Navoiy viloyat Kengashi raisi Rustam Xayitovning kun tartibidagi mavzu yuzasidan maʼruzasi tinglandi. Maʼruzachi taʼkidlaganidek, umumxalq muhokamalarida maromiga yetkazilgan qonun loyihasi referendum yoʻli bilan qabul qilinadi. Yangilanayotgan Konstitutsiya yurtimiz taraqqiyoti va xalqimiz farovonligi rivojiga xizmat qilishi shubhasizdir. Unda eng avvalo “Inson qadri uchun” gʻoyasi ustuvor yoʻnalish sifatida belgilangani katta ahamiyatga ega. Prezidentimiz taʼkidlaganidek, bu “Konstitutsiyaning yagona manbai va muallifi – xalqdir” degan tamoyilga toʻla mos keladi. Seminar davomida soʻz olganlar Konstitutsiyamizga kiritilayotgan oʻzgartishlar yuzasidan oʻz fikr mulohazalarini bildirdilar.

Ishtirokchilar qonun loyihasi yuzasidan oʻzlarini qiziqtirgan savollariga batafsil javob oldilar. Jamoatchilik orasida amaldagi qonunchilik asosida referendumni oʻtkazilishi, fuqarolarning unda ishtiroki boʻyicha targʻibot ishlarini olib borish yuzasidan aniq vazifalar belgilab olindi.

Oʼzbekiston "Аdolat" SDP

Navoiy viloyat Kengashi

Matbuot xizmati.